A Concellería de Dereitos e Servizos Sociais presentou hoxe o novo curso da Escola de Segunda Oportunidade, un programa municipal desenvolvido en colaboración con Compostela Solidaria e dirixido a poboación adulta sen titulación básica. Na comparecencia, a concelleira María Rozas estivo arroupada polo equipo docente e técnico: o coordinador Antón Porteiro, a técnica do Plan de Inclusión do Concello Elena González e o vicepresidente de Compostela Solidaria Carlos Nieves, xunto aos profesores Antonio Segura, Jaime Romero, Abelino Gallardo e Mercedes Espiño.
Segundo explicou María Rozas, o obxectivo é mellorar as competencias académicas e ofrecer ferramentas para que o alumnado poida obter a ESO e ampliar as opcións de emprego. A concelleira lembrou que “as baixas cualificacións dificultan a inserción laboral” e referiuse a datos que evidencian maiores taxas de paro de longa duración entre quen non conta coa secundaria completa. “Cómpre reforzar esta escola e dar a coñecer máis o programa para chegar a máis xente”, sinalou.
A matrícula estará aberta do 09 ao 17 de outubro e as clases arrancarán o 20 de outubro. O curso impartirase no edificio da Casa das Asociacións de Benestar Social (Sanguiriños), luns, mércores e venres, de 10:00 a 13:00. As persoas interesadas poderán inscribirse a través do Plan de Inclusión do Concello —por teléfono ou por correo electrónico—. Requisito: estar empadroado/a no Concello de Santiago.
O programa, activo desde 2019, céntrase na preparación das probas libres de Educación Secundaria para persoas adultas. Antón Porteiro precisou que se traballa tanto nos contidos das áreas como nos métodos para afrontar o exame, con atención ás probas de competencias clave (de utilidade para formación ocupacional, aínda que non equivalen a un título oficial) e, especialmente, á ESO, que abre o acceso a bacharelato e ciclos de FP. “O noso interese é que a xente aprobe o exame”, resumiu. O docente engadiu que, malia que a avaliación segue a ser presencial e escrita, nas aulas se introducen internet e mesmo ferramentas de intelixencia artificial para apoiar a aprendizaxe: “O alumnado debe habituarse a traballar con elas”.
A proba da ESO estrutúrase en tres áreas (científico-técnica, sociolingüística e social-humanística), que se poden superar por separado e conservar para chamadas posteriores se non se aproba todo o conxunto. O calendario deste ano adiantou a primeira convocatoria a abril, con segunda opción en xuño. Para presentarse non é imprescindible o DNI: chega con pasaporte, algo especialmente útil para persoas en proceso de regularización documental.
O perfil do alumnado combina veciñanza que interrompeu estudos antes dos 16 anos con poboación migrante que precisa acreditar estudos en España. A experiencia dos últimos cursos amosa itinerarios de éxito: exalumnado que, tras obter a ESO, cursou FP e accedeu ao mercado de traballo. A capacidade ordinaria do grupo sitúase arredor das 20 prazas; se a demanda o require, a organización valora duplicar quendas para que “ninguén quede fóra por cuestión de aforo”.
Carlos Nieves agradeceu o apoio municipal —recursos materiais, persoais e infraestruturas— e puxo en valor o compromiso do claustro: “É unha ensinanza vocacional que acompaña ás persoas para que poidan seguir a súa vida laboral”. Pola súa banda, o profesorado subliñou que a asistencia presencial é determinante: os mellores resultados concéntranse entre quen acode ás aulas con regularidade.
