A concelleira non adscrita de Santiago, Mercedes Rosón, reclamou ao goberno local un protocolo de información pública sobre o procedemento para a poxa de inmobles do Rexistro de Solares municipal porque, segundo denunciou, o persoal non conta coa información que solicitan os interesados no proceso.
“A impaciencia do señor Lestegás por anunciar a poxa está a provocar a saturación do servizo de Urbanismo”, respondeu a edil.
Ademais, tamén insistiu en sinalar que esta situación supón “un novo exemplo de falta de planificación e traballo previo”. Para a concelleira, o goberno de Goretti Sanmartín “excédese en promoción precoz e tropeza en transparencia e xestión”.
Neste sentido, Rosón explicou que a orde “normal” do proceso debería ser definir o procedemento e informar a todo o persoal antes de facer pública a poxa “para evitar a desinformación e que o departamento de Urbanismo teña que seguir atendendo solicitudes constantes sen dispor da información que lle solicita a xente”.
Por iso, aínda que recoñeceu que se trata dun “procedemento lento”, Rosón lembrou que o Rexistro de Solares “foi reactivado no último mandato de Sánchez Bugallo”. Do mesmo xeito, insistiu en que “a responsabilidade de facer as cousas ben debería estar por encima das présas para xerar titulares”.
