O Foro Galego de Inmigración deu a coñecer este xoves a situación de cinco inmigrantes senegaleses que están en risco de quedar na rúa en Santiago de Compostela e advertiu das condicións de vida nas que se atopan aquelas persoas migrantes cunha resolución de asilo negativa por parte do Goberno. Nunha rolda de prensa acompañado por representantes da Rede Galega de Apoio ás Persoas Refuxiadas, o portavoz do Foro Galego de Inmigración, Miguel Fernández, expuxo o caso de cinco senegaleses con resolución negativa, aos que están a axudar.
En concreto, un deles aínda non foi desaloxado e os catro restantes atopábanse no albergue do Monte do Gozo ata o día 15 deste mes, cando tiñan que abandonar a vivenda. Actualmente, dous deles atópanse no albergue de Xoán XXIII e outros dous mantéñense no do Monte do Gozo, pero sen dereito a comida. Amadou Diallo, un dos migrantes que actualmente reside no Monte do Gozo e que se atopa facendo un curso de hostalaría, mostrou a dificultade da súa situación e expresou o abafo e a incerteza que vive pola posibilidade de quedar na rúa.
Neste escenario, Miguel Fernández cualificou de “apaños” as medidas que está a levar a cabo o Foro, con axuda do Concello de Santiago, para evitar que estas persoas queden na rúa e asegurou que estes non se corresponden co que debería de ser un programa por parte do Goberno que prestase unha atención “digna”. Así mesmo, incidiu na importancia da nacionalidade nestes casos, xa que sostido que aquelas persoas procedentes de países en guerra teñen máis posibilidades de recibir unha resolución de asilo positiva que no caso de migrantes como os afectados neste caso, que proceden de Senegal.
Na mesma liña, a representante da Rede Galega na reunión, Cristina Bandín, comparou a lei contra o abandono animal coa situación destas persoas, cualificando de “inadmisible” o feito de “abandonar desta forma a ningunha persoa”. Bandín tamén fixo un símil co turismo, ao soster que Santiago recibe a “máis de 450.000 turistas ao ano” e pon “pegas” para acoller a unhas poucas persoas.
