A alcaldesa de Santiago, Goretti Sanmartín, insistiu este xoves en que será o pleno da corporación o que decida sobre a xestión municipal da auga, unha vez estudados os informes que encargue a comisión recentemente creada para ese fin.
Este mércores o Concello informaba de que o pleno da Corporación de maio debaterá unha proposta da Alcaldía para crear unha comisión especial que analizará a forma “máis sustentable e eficiente” da xestión do ciclo da auga, que estará integrada por unha representación de todos os grupos e por persoal técnico municipal.
Esta comisión, segundo indicaron, elaborará un informe coas conclusións de acordo co estudo realizado en xullo de 2020, “sen prexuízo de impulsar outros traballos que xulgue necesarios” para o cumprimento do seu fin.
O obxectivo, sostén o goberno local, é “dar os pasos necesarios para regularizar os servizos básicos de abastecemento de auga e saneamento” que se prestan dunha maneira precaria no concello de Santiago de Compostela desde que venceu a prórroga do contrato.
Este xoves, a preguntas dos medios, a alcaldesa insistiu en que, per se, nin a xestión directa nin indirecta é mellor e que haberá que estudar “cada caso particular”.
“En cada lugar, haberá que determinar cal é o estado das infraestruturas, como son os investimentos que hai que facer a medio, curto e longo prazo… Entón, determinar o que é máis eficiente, máis sustentable e mellor economicamente”, explicou.
Precisamente para iso, sinalou, encárganse os estudos sobre os que reflexionará a comisión, algo ao que, lembrou, comprometeuse a súa formación en campaña.
Aínda que evitou dar prazos, si asegurou que a idea é “facelo canto antes” e traballar con “a máxima celeridade”.
Tal e como informaban este mércores, a proposta para pór en marcha esta comisión inclúe que estará integrada pola alcaldesa ou membro da Corporación en quen delegue, que actuará como presidente da comisión, e dous membros representantes do seu respectivo grupo municipal dos que forman a Corporación.
Ademais, estarán as persoas titulares de órganos e postos técnicos, que terán voz pero non voto, da Secretaría do pleno, da Dirección da Asesoría Xurídica, da Intervención municipal, da Dirección da área de Urbanismo e Infraestruturas, da Coordinación Xeral, da Xefatura de Sección de Saneamento e da Dirección da área de Sustentabilidade e Servizos Básicos, que actuará como secretaria desta comisión.
Cando se constitúa a comisión, poderá requirir o asesoramento que considere, tanto de persoal técnico municipal como externo, e cando o así o decida, dará conta ao pleno dos seus avances ou das decisións adoptadas.
Reunión o luns con traballadores de Raxoi
Por outra parte, a rexedora compostelá insistiu en que as demandas presentadas este mércores por un grupo de funcionarios do Concello, que se mobilizou aproveitando a recepción oficial con motivo da celebración da súa patroa, Santa Rita de Casia, xa están atendidas.
Segundo indicou, estas cuestións están “garantidas”; “non só comprometidas, senón feitas” e considera que agora só se trata dunha “preocupación polo espazo temporal” nas que se implementarán.
Estas cuestións abordaranse o vindeiro luns nunha reunión que manterán coa representación sindical.
