O candidato socialista á Alcaldía de Santiago, Pedro Blanco, defendeu que o futuro desenvolvemento urbanístico de Mallou debe servir para incrementar a oferta de vivenda e, ao mesmo tempo, incorporar novos servizos e melloras para o barrio. O socialista reclamou ademais que o proceso se leve a cabo coa participación da veciñanza e das persoas propietarias afectadas polo Proxecto de Interese Autonómico (PIA) previsto pola Xunta de Galicia.
Blanco abordou a situación nun encontro con integrantes da Asociación Veciñal de Casa Agraria, no que estivo acompañado polos concelleiros do PSdeG Marta Abal e Gumersindo Guinarte. A reunión enmárcase nas ‘Conversas de Barrio’, unha iniciativa coa que o candidato está a manter encontros con entidades, colectivos e residentes dos diferentes barrios e parroquias compostelás antes de concretar as propostas do seu proxecto para a cidade.
Durante a xuntanza, os participantes abordaron as preocupacións existentes arredor do desenvolvemento previsto para Mallou e das consecuencias que terá para as persoas que actualmente residen ou dispoñen de propiedades neste ámbito. Blanco sostivo que a creación de nova vivenda debe compatibilizarse cos dereitos da poboación que xa está asentada na zona e coa mellora das condicións do propio barrio.
Neste sentido, o candidato socialista pediu tanto á Xunta como ao Concello de Santiago que establezan un mecanismo permanente de diálogo, información e acompañamento para a veciñanza e as persoas propietarias. Entre outras cuestións, reclamou que estas poidan consultar a documentación técnica relacionada co proxecto e que as alegacións presentadas reciban unha resposta efectiva durante a tramitación.
“O Concello e a Xunta teñen que sentarse, dialogar e buscar as mellores solucións para a cidadanía. Non vale mirar cara outro lado”, afirmou Blanco, que considera necesario que ambas as administracións se impliquen no proceso e manteñan informadas as persoas directamente afectadas polos cambios urbanísticos previstos.
Outro dos asuntos tratados foi o proceso de expropiación e a valoración dos terreos afectados. O candidato defendeu a posición que xa trasladara o Grupo Municipal Socialista e pediu que cada parcela conte cunha valoración individualizada, motivada e transparente. Así mesmo, reclamou que, dentro do marco establecido pola normativa, se empreguen os criterios máis favorables posibles para as persoas propietarias.
Blanco situou esta cuestión dentro dunha proposta máis ampla na que a vivenda, a renovación urbana e o benestar social figuran entre os ámbitos que pretende priorizar. Ao seu xuízo, a administración municipal debe desempeñar un papel activo ante os novos desenvolvementos previstos na cidade e aproveitar estes procesos para responder á demanda residencial e introducir melloras nos barrios.
Neste contexto, o candidato sostivo que o crecemento de Mallou non debería limitarse á construción de novas vivendas, senón que debe acompañarse de servizos, espazos públicos e mellores conexións que repercutan tamén nas persoas que xa viven na zona.
“O futuro de Mallou ten que construírse escoitando á súa veciñanza. Queremos vivenda, pero tamén queremos que este desenvolvemento sirva para mellorar o barrio, os seus servizos e as súas conexións. Non podemos permitir deixar a ninguén atrás”, manifestou.
