O líder do Partido Popular de Santiago, Borja Verea, reclamou ao Goberno municipal unha resposta ante a información recibida polas preto de 200 traballadoras do Servizo de Axuda no Fogar (SAF) de que non percibirán a nómina correspondente ao mes de setembro. O portavoz popular pediu ao Concello que confirme publicamente esta situación e detalle as actuacións realizadas coa empresa responsable do servizo.
As profesionais do SAF encárganse da atención nos domicilios de persoas maiores e dependentes de Santiago. Segundo trasladou Verea, as traballadoras terían coñecido a situación ao chegar ao final do mes, polo que reclamou ao executivo municipal que explique as medidas previstas para garantir o pagamento dos salarios.
“Pedímoslle ao goberno municipal que confirme publicamente se é certo e, se é así, que explique que actuacións realizou ante a empresa e que medidas vai adoptar. Estamos falando de 200 traballadoras que cumpriron co seu traballo e que agora chegan a final de mes sen cobrar”, sinalou o líder dos populares composteláns.
Verea puxo o foco nas consecuencias económicas que un eventual impago pode ter nos fogares das empregadas, especialmente nos gastos habituais vinculados á vivenda, á alimentación ou aos recibos. “Nun momento especialmente complicado polo custo da vivenda e da vida diaria, deixar a 200 traballadoras sen a súa nómina significa poñerlles moito máis difícil pagar o alugueiro ou a hipoteca, facer a compra ou afrontar os recibos”, afirmou.
A situación denunciada polo PP non se limitaría á mensualidade de setembro. Segundo a información trasladada polos traballadores aos populares, continúa pendente o pagamento da paga extraordinaria do verán e parte do persoal estaría a adiantar cos seus propios recursos os gastos derivados dos desprazamentos necesarios para realizar as atencións domiciliarias.
Ante este escenario, Verea reclama ao Concello que exerza as súas funcións de supervisión como administración responsable do contrato e demande á empresa encargada do SAF o cumprimento das súas obrigas co persoal. O popular considera que o Goberno municipal debe informar tamén das medidas que está a adoptar para resolver a situación.
“Un goberno que se define como social non pode permanecer impasible cando 200 traballadoras dun servizo público esencial non cobran. A sensibilidade social demóstrase nestes momentos: estando ao lado das persoas e buscando solucións”, declarou Verea.
O portavoz do PP relacionou tamén este episodio coa xestión diaria dos servizos municipais e incidiu na necesidade de garantir tanto os dereitos económicos das profesionais como a continuidade da atención ás persoas que dependen do SAF. “Aquí temos traballadoras que non cobran e persoas maiores e dependentes que necesitan que este servizo funcione. O goberno municipal ten que actuar e dar explicacións”, concluíu.
