O Grupo Municipal Socialista de Santiago levará ao Pleno ordinario deste mes unha proposta para que o Concello impulse un Plan Director de Instalacións e Equipamentos Deportivos, co obxectivo de avaliar as necesidades actuais da cidade e organizar as actuacións que serán necesarias nos próximos anos ante o incremento da práctica deportiva.
A concelleira socialista Marta Abal sostén que a evolución do número de persoas usuarias e dos clubs non está acompañada por un crecemento equivalente dos espazos dispoñibles. “En Compostela, o deporte medra. Medran as usuarias e os usuarios, medran os clubs e medra a demanda, pero as instalacións non medran ao mesmo ritmo”, sinalou. A edil tamén considera necesario revisar o aproveitamento dos equipamentos xa existentes, tanto os de titularidade municipal como os pertencentes a outras administracións ou entidades privadas.
A proposta do PSOE pasa pola elaboración dun documento de planificación que se poida actualizar de maneira periódica e que recolla tanto as necesidades deportivas da cidade como os recursos xa existentes. Segundo explicou Abal, este instrumento serviría para “coñecer as necesidades reais de Compostela, saber con que recursos contamos e como podemos aproveitalos mellor”, ademais de establecer unha programación dos investimentos e intervencións futuras.
Para os socialistas, esa análise permitiría determinar en que zonas ou disciplinas existe unha maior presión sobre as instalacións e organizar con antelación a resposta municipal. “Precisamos unha folla de ruta clara que nos permita anticiparnos e dar resposta a unha demanda deportiva que non deixa de medrar”, afirmou a concelleira.
O grupo municipal reclama, ao mesmo tempo, medidas a curto prazo mentres non entren en funcionamento novos equipamentos. Abal considera que o Concello debería estudar distintas posibilidades para ampliar a dispoñibilidade de espazos e horarios, incluíndo acordos con outras entidades que conten con instalacións susceptibles de ser empregadas polos clubs ou pola cidadanía.
Esta procura de alternativas debería incluír tamén, segundo a proposta socialista, as instalacións destinadas á práctica de actividades acuáticas. A concelleira pediu explorar “fórmulas de colaboración con outras entidades para que os clubs e as persoas usuarias dispoñan dos espazos e dos horarios que precisan” mentres non se produza unha ampliación da oferta municipal.
