O Partido Popular de Santiago reuniu, coincidindo co inicio do curso escolar, nove propostas dirixidas ás familias compostelás que a formación prevé incorporar ao seu proxecto de cara ao próximo mandato municipal. As iniciativas, presentadas por separado durante os últimos meses polo líder do PP local, Borja Verea, abranguen ámbitos como a conciliación, as actividades fóra do horario lectivo, o transporte escolar, o estacionamento ou a alimentación nos centros educativos.
“Os pais e as nais van ser unha prioridade absoluta do próximo goberno municipal. E non o dicimos como unha declaración de intencións: detrás hai xa nove propostas concretas para facerlles máis fácil o día a día”, sinalou Verea ao recompilar agora as medidas.
Unha das propostas pasa por que o Concello de Santiago se encargue da organización das actividades extraescolares nos colexios, unha tarefa que actualmente recae en boa medida sobre as asociacións de nais e pais. O modelo defendido polos populares pretende manter unha programación estable durante as tardes do curso escolar e descargar as ANPAS da súa xestión.
No ámbito educativo, o PP tamén propón crear un programa municipal de inmersión lingüística en Irlanda para o alumnado de 3º da ESO. A intención anunciada pola formación é que poida participar todo o estudantado compostelán dese curso mediante estadías durante o verán.
Para os meses non lectivos, a formación incorpora ademais a creación de catro novos campamentos municipais en diferentes puntos de Galicia, que se sumarían á oferta existente para ampliar as alternativas de conciliación durante as vacacións escolares.
Parte do paquete de medidas céntrase na mobilidade diaria das familias. A denominada ‘Parada Familia’ consistiría na habilitación de espazos de estacionamento para paradas de moi curta duración, pensados tanto para levar ou recoller menores nos centros educativos como para xestións rápidas en lugares como farmacias ou centros de saúde.
Xunto a esta iniciativa, os populares propoñen unha bolsa específica de zona azul para pais e nais, que facilitaría o uso do estacionamento regulado para desprazamentos relacionados co coidado dos fillos. A nota difundida pola formación non concreta polo momento o número de horas dispoñibles, os requisitos para acceder a elas nin o custo que tería para as arcas municipais.
UN SERVIZO DE CANGURAXE E UNHA CASA DAS FAMILIAS
Outro dos compromisos que Verea incorpora ao seu programa é a creación dun servizo municipal de canguraxe para cubrir situacións puntuais nas que as familias non dispoñan doutra persoa coa que deixar os menores. O PP expón que funcionaría cun horario amplo e cun límite de horas de utilización para cada unidade familiar.
A proposta complétase coa creación dunha Casa das Familias, que os populares conciben como un equipamento municipal ao que acudir para obter información, orientación e apoio relacionado coas necesidades familiares.
Na alimentación escolar, o PP defende unha Rede de Cociñas Escolares que comezaría cunha primeira fase en tres colexios composteláns. O obxectivo anunciado é avanzar cara a un sistema no que os menús poidan elaborarse nos propios centros, aínda que a formación non detallou nesta presentación cales serían eses tres colexios nin o investimento necesario para desenvolver a medida.
ATA 80 EUROS MENSUAIS PARA O TRANSPORTE ESCOLAR
A novena proposta é ColeBus, presentada polo PP compostelán ao inicio deste mes de setembro. O programa prevé conceder unha axuda de ata 80 euros ao mes por fillo para pagar o transporte escolar organizado polos centros concertados. Segundo os detalles ofrecidos na presentación desta iniciativa, a subvención non estaría vinculada á renda e adaptaríase ao custo real do autobús cando este fose inferior aos 80 euros mensuais.
Verea cifrou previamente entre 1,1 e 1,2 millóns de euros anuais o posible custo desta medida para o Concello. A organización das rutas seguiría correspondendo aos propios centros, mentres que a administración local asumiría a concesión das axudas ás familias.
O PP relaciona tamén esta iniciativa coa mobilidade urbana e sostén que un maior uso do transporte colectivo escolar permitiría reducir os desprazamentos en vehículo privado nas entradas e saídas dos colexios. “Cada neno que poida ir ao colexio en autobús pode ser un coche menos nas rúas de Santiago”, afirmou Verea.
Na presentación de ColeBus, o líder popular indicou que arredor de 3.100 dos aproximadamente 4.500 estudantes dos centros concertados composteláns se concentran no eixo comprendido entre a Praza de Galicia, Virxe da Cerca e San Caetano, segundo os datos utilizados pola formación para fundamentar a proposta.
UN PAQUETE QUE O PP QUERE INCORPORAR AO SEU PROXECTO MUNICIPAL
Verea presenta agora estas iniciativas como partes dunha mesma política municipal e non como propostas independentes. O paquete pretende actuar sobre distintos momentos da vida diaria das familias, desde a entrada e saída dos centros ata as tardes, as vacacións escolares ou os problemas puntuais de conciliación.
“Falamos das mañás, das tardes, do colexio, do verán, dos imprevistos, da mobilidade ou da alimentación dos nosos fillos. Non son nove medidas illadas. Son unha forma de entender a cidade”, afirmou o líder do PP compostelán.
