A alcaldesa de Santiago, Goretti Sanmartín, anunciou que a cidade foi declarada oficialmente como zona de mercado residencial tensionado, tras recibir a resolución asinada na mañá deste venres.
Segundo explicou, esta decisión permitirá ao Concello aplicar medidas de contención dos prezos do alugueiro previstas na lexislación estatal, así como acceder a maiores recursos no Plan Estatal de Vivenda. “Estamos ante unha moi boa nova para o Concello de Santiago”, afirmou.
A rexedora indicou que a cidade cumpre amplamente os criterios esixidos, destacando que o prezo do alugueiro medrou nos últimos cinco anos por riba do IPC, chegando a duplicar o incremento requirido como indicador. Tamén sinalou que o custo da vivenda segue a aumentar, aínda que cun ritmo menor que noutros municipios próximos.
Sanmartín criticou, non obstante, o proceso de comunicación da resolución, que cualificou de tardío. “Esta declaración chega tarde, sen ningunha dúbida”, asegurou, ao tempo que lamentou que o Concello tivese coñecemento previo a través dos medios de comunicación.
O goberno local dispón agora dun prazo de dous meses para aprobar definitivamente o plan de medidas correctoras, que xa foi elaborado polo departamento de Urbanismo e Vivenda e que inclúe accións para regular o mercado e mellorar o acceso á vivenda. A alcaldesa avanzou que este documento será presentado con detalle nos vindeiros días.
Entre os efectos inmediatos da declaración, o Concello poderá limitar os incrementos de prezos en determinadas circunstancias e reforzar políticas públicas orientadas a garantir o acceso á vivenda. “Defendemos que a vivenda é un dereito para o conxunto da poboación”, subliñou.
Sanmartín indicou ademais que a efectividade plena das medidas dependerá da validación definitiva por parte da administración estatal, un trámite que, segundo experiencias anteriores, podería demorarse varias semanas. Mentres tanto, o executivo municipal continuará desenvolvendo e actualizando o plan, que definiu como un “documento vivo” suxeito a revisión continua.
