A concelleira do Partido Popular de Santiago, Olaya Otero, propuxo a posta en marcha de talleres de oficios artesanais dirixidos á mocidade como medida para impulsar a remuda xeracional e facer fronte ao peche continuado de establecementos comerciais na cidade.
A edil sinalou que a situación do comercio local “levamos tempo alertando da situación do comercio na cidade e, desafortunadamente, as últimas novas veñen a darnos a razón”. Neste sentido, lembrou que durante o ano 2025 pecharon 100 establecementos comerciais en Santiago, mentres que nos dous primeiros meses de 2026 a cifra ascende xa a 41 negocios, segundo datos da Unión de Profesionais e Traballadores Autónomos (UPTA).
Otero indicou que unha parte destes peches está relacionada coa falla de remuda xeracional, ao apuntar que arredor do 30% dos comerciantes composteláns teñen máis de 62 anos. A esta circunstancia sumou a perda de tecido empresarial, ao afirmar que Santiago perdeu máis de 700 empresas nos últimos oito anos.
A concelleira popular criticou a actuación do goberno municipal, formado por BNG e CA, ao considerar que “esta realidade non provocou reacción algunha” e preguntou “que pensan facer para frear o peche de establecementos comerciais, recuperar proxectos económicos e mellorar a remuda xeracional”.
Tamén cuestionou medidas adoptadas no casco histórico, como a limitación de novos negocios vinculados ao turismo, e asegurou que “o único que lograron é contribuír a que o Casco Antigo siga esmorecendo”.
Ante este escenario, Otero defendeu a necesidade de impulsar iniciativas que favorezan o emprego e a continuidade dos negocios, destacando a proposta de talleres artesanais como unha ferramenta para achegar a mocidade a oficios tradicionais e cubrir a demanda de man de obra. Segundo explicou, esta medida tamén respondería ás peticións do sector artesanal e da propia mocidade para poñer en valor estas profesións.
A edil insistiu en que a situación require unha resposta global, polo que reclamou a elaboración dun plan estratéxico con medidas específicas para os distintos sectores económicos da cidade. “Medidas dispersas e puntuais xa non son suficientes”, advertiu.
