O portavoz do Partido Popular en Santiago, Borja Verea, valorou o pleno municipal no que os orzamentos do goberno local non foron aprobados, ao non contar co respaldo suficiente, e interpretou o resultado como unha mostra de falta de cohesión no executivo. Segundo indicou, a situación evidencia “un novo episodio do tripartito dos líos que leva meses bloqueando a cidade”.
O dirixente popular cualificou o proxecto económico presentado como insuficiente e asegurou que chega ao pleno “completamente suspenso, un suspenso político e tamén un suspenso en xestión”. Neste sentido, apuntou que a falta de apoio por parte dos socios do goberno municipal reflicte que “nin os propios socios da alcaldesa cren no seu proxecto”.
Desde o grupo popular sinalaron que non apoiaron as contas ao considerar que non responden ás necesidades da cidade nin ao seu modelo de xestión. Verea afirmou que o seu partido representa “unha alternativa real de goberno fronte a este espectáculo permanente de enfrontamentos internos” e engadiu que “non imos participar deste tripartito dos líos; queremos facer as cousas doutro xeito e mellor”.
Durante a súa intervención, expuxo algunhas das medidas que incluiría un hipotético orzamento liderado polo PP, entre elas a apertura do Parque de Belvís, o derrubo da Casa da Xuventude, a retirada de radares no túnel de Conxo, a creación dun banco público de vivenda en alugueiro con incentivos fiscais ou a redacción dun novo PXOM para favorecer a construción e rehabilitación.
Tamén fixo referencia a actuacións en materia de equipamentos e servizos, como a construción dunha piscina olímpica en Santa Marta, unha cidade do fútbol en San Lázaro ou a implantación dunha rede de conciliación con servizos como madrugadores, comedores e actividades extraescolares. Ademais, mencionou un modelo de cociñas propias nas escolas, a creación de parques infantís cubertos e medidas para o rural, así como novos aparcadoiros en zonas como o Campus Sur e Belvís.
No ámbito da seguridade e mantemento urbano, propuxo a instalación de cámaras de videovixilancia, o reforzo da Policía Local e plans específicos para mellorar viarios, beirarrúas, limpeza e o Refuxio de Bando. Neste contexto, asegurou que “Santiago está máis sucio, máis inseguro e máis abandonado que nunca”.
O líder popular tamén cuestionou as previsións económicas do documento orzamentario, indicando que, segundo os servizos técnicos municipais, son “irrealistas” e mesmo “de fantasía”, o que, ao seu xuízo, xera dúbidas sobre a viabilidade das contas. Así mesmo, criticou que se trate, segundo afirmou, dun proxecto con elevada recadación por impostos e multas e cun nivel de investimento reducido.
Verea responsabilizou ao BNG, Compostela Aberta e PSOE da situación actual da cidade e fixo referencia a cuestións como a evolución da criminalidade, o estado da limpeza, a vivenda ou a morosidade municipal. Por último, cuestionou a posición dos socialistas e sinalou que, no caso de vincular os orzamentos a unha cuestión de confianza, “abriríase unha oportunidade real para cambiar o goberno da cidade en 30 días”.
O portavoz popular concluíu que o pleno evidencia a existencia de “dous modelos”: “o do lío permanente do tripartito e o da alternativa de goberno que representa o Partido Popular”, asegurando que o seu grupo continuará traballando para optar ao goberno municipal.
