A concelleira do Grupo Municipal Socialista en Santiago, Marta Abal, denunciou o que cualifica como un incumprimento do Goberno local en relación coa reapertura do pavillón de Santa Isabel, que continúa pechado máis dun mes despois do anuncio realizado polo executivo encabezado por Goretti Sanmartín.
Segundo indicou Abal, a alcaldesa comunicara no mes de febreiro a intención de reabrir a instalación deportiva, un anuncio que, segundo a edil socialista, xerou “expectativas que a día de hoxe non se cumpriron”. Neste momento, sinala, o pavillón segue sen contar cunha data concreta para a súa posta en funcionamento.
A concelleira advertiu de que esta situación está a provocar “importantes prexuízos” tanto para os clubs deportivos como para as persoas usuarias do recinto, que se ven obrigadas a adaptar ou modificar a súa actividade. Neste contexto, referiuse a “atrasos, cambios e unha total falta de certezas” na planificación deportiva.
Abal cuestionou a xestión do Goberno municipal, ao considerar que non pode “limitarse a facer anuncios sen garantir o cumprimento dos prazos”, e sinalou que o caso do pavillón evidencia, ao seu xuízo, “unha clara falla de xestión”.
A edil socialista destacou tamén o papel do pavillón de Santa Isabel como unha infraestrutura “fundamental para a cidade”, subliñando o seu impacto no conxunto do tecido deportivo compostelán, ao que, segundo afirmou, está a afectar directamente o peche prolongado da instalación.
Por último, Marta Abal reclamou ao executivo local explicacións inmediatas e unha solución á situación actual, insistindo en que os clubs e a cidadanía “merecen certezas” e demandando a reapertura do pavillón “sen máis demoras”.
