O concelleiro do Partido Popular en Santiago, José Ramón de la Fuente, advertiu dunha evolución á alza da criminalidade na cidade tras a publicación dos últimos datos oficiais, que sitúan a capital galega como a segunda urbe onde máis medra a delincuencia e como a que presenta maior número de delitos por cada mil habitantes, cunha taxa de 51,28.
O edil popular puxo o foco en varios indicadores que cualificou de preocupantes. Entre eles, destacou o incremento dos roubos con violencia e intimidación, que pasan de 48 a 83 casos, o que supón un aumento do 72,92 %. Segundo sinalou, trátase de feitos que implican agresións ou ameazas directas e que repercuten na percepción de seguridade da cidadanía.
Tamén se referiu ao aumento dos roubos con forza en domicilios, que medran un 16,8 %, ao pasar de 95 a 111 casos no último ano. A isto engadiu o incremento das lesións e liortas tumultuarias, que soben de 58 a 82 episodios, cunha subida do 41,38 %, unha situación que, segundo indicou, ten especial incidencia en zonas vinculadas ao ocio nocturno.
De la Fuente afirmou que estes datos “confirman o que levamos meses escoitando nas rúas: a tranquilidade da que presume o goberno de BNG e CA era máis aparente que real”, e apuntou a distintos episodios recentes relacionados con altercados e actividade vinculada ao trapicheo de drogas en diversos puntos do municipio.
Entre as áreas nas que a veciñanza trasladou a súa preocupación citou barrios e zonas como o Ensanche, Conxo, Vite, Almáciga, o Casco Histórico, o Toural, Fontiñas, San Pedro, Santa Marta ou Laraño, así como a parroquia de Figueiras. O edil mencionou incidentes como un conato de incendio nun inmoble da rúa Alfredo Brañas, actuacións policiais en puntos de venda de droga ou altercados rexistrados en locais de ocio.
O representante popular recoñeceu o labor das forzas de seguridade ao sinalar que “a Policía Local e a Policía Nacional están a facer un traballo encomiable”, pero considerou necesario acompañar ese labor con medidas estruturais e decisións políticas.
Neste sentido, o grupo municipal do PP propón reforzar a presenza policial nas zonas con maior incidencia, especialmente en horarios considerados máis conflitivos; ampliar e modernizar os sistemas de videovixilancia; desenvolver un plan específico contra o tráfico de drogas a pequena escala; e impulsar un plan de seguridade para o ocio nocturno.
Ademais, De la Fuente incidiu na importancia de actuacións preventivas desde a xestión municipal, como a mellora da iluminación pública en rúas e espazos peonís. “Unha cidade ben iluminada é unha cidade máis segura”, afirmou.
O concelleiro concluíu que “Santiago non pode normalizar que medren os roubos violentos, as pelexas e o trapicheo mentres o goberno municipal minimiza o problema”, e reclamou unha resposta inmediata baseada na planificación e na adopción de medidas concretas.
