O Ateneo de Santiago celebra hoxe, ás 19:30, unha nova sesión do Seminario Europa baixo o título ‘Galicia e Europa no mundo’. A actividade terá lugar no Salón de Actos Isaac Díaz Pardo, na sede da entidade situada na Praza de Salvador Parga, 4-2º, e está organizada en colaboración coa Asociación Federalista de Galicia.
O encontro contará coa intervención de Adrián Vázquez Lázara, deputado no Parlamento Europeo, e será presentado por Cristina Ares Castro-Conde, profesora de Política da Unión Europea na Universidade de Santiago de Compostela.
A sesión abordará o papel que Galicia pode desempeñar no escenario europeo, así como os retos e posibilidades que se derivan do actual contexto internacional. O Seminario Europa está concibido como un espazo de análise e diálogo arredor da construción comunitaria, das súas institucións e da súa repercusión na realidade política, económica e social galega. Ao longo do curso, o ciclo prevé a participación de representantes das distintas formacións políticas galegas con presenza en Europa.
TRAXECTORIA INSTITUCIONAL E ACADÉMICA
Adrián Vázquez Lázara exerce como eurodeputado e preside desde 2020 a Comisión de Asuntos Xurídicos do Parlamento Europeo. Ademais, forma parte como membro suplente da Comisión de Agricultura e Desenvolvemento Rural. A súa traxectoria inclúe experiencia en relacións internacionais, con participación en institucións como a OSCE e a OTAN.
No ámbito académico, formouse en Dereito na Universidade Complutense de Madrid e completou estudos de lingua e cultura xaponesa en Tokio. É licenciado en Estudos Internacionais pola Universidade de Lindenwood e conta cun máster en Relacións Internacionais pola Universidade de Warwick. Desde xaneiro de 2022, desenvolve tamén actividade docente en ESADE e no Centro Universitario Cardeal Cisneros.
