O Grupo Municipal Socialista de Santiago expresou a súa preocupación pola situación xerada despois de que a empresa Eulen anunciase a súa renuncia ao Contrato para a Dinamización e Mediación Sociocultural da Rede de Centros Socioculturais. A concelleira socialista Marta Abal advertiu das consecuencias que esta decisión pode ter tanto para o persoal como para a continuidade dun servizo que cualificou de esencial para a cidade.
Nas súas declaracións, Abal trasladou a solidariedade do seu grupo coas traballadoras e traballadores afectados, sinalando que “non poden seguir pagando as consecuencias dunha mala xestión”. A edil atribuíu a situación ao Goberno municipal formado polo Bloque Nacionalista Galego e Compostela Aberta, aos que responsabilizou directamente da crise aberta no ámbito dos centros socioculturais.
Segundo expuxo a representante socialista, a renuncia da empresa concesionaria é o resultado dunha xestión que cualificou de deficiente, marcada pola falta de previsión e pola ausencia de resposta ante incumprimentos coñecidos. “Foi o Executivo Municipal quen permitiu que o problema medrase ata converterse nunha crise que hoxe pon en risco os dereitos das traballadoras e a estabilidade dun servizo público esencial”, afirmou.
Desde o PSOE consideran que a rede de centros socioculturais atravesa “a peor etapa da súa historia” e reclaman responsabilidades políticas polo sucedido. A formación insiste en que a prioridade debe ser garantir a estabilidade laboral do persoal e asegurar a continuidade do servizo con todas as garantías, evitando novas situacións de incerteza.
A concelleira subliñou tamén o papel que estes equipamentos teñen na vida comunitaria de Santiago de Compostela, ao considerar que son fundamentais para a cohesión social da cidade. Neste sentido, Abal advertiu de que “non cabe máis improvisación nin máis erros” na xestión dun servizo que atende a unha parte relevante da veciñanza.
CRÍTICAS POR PARTE DO PP
Dende o Partido Popular de Santiago sumáronse ás críticas á xestión municipal pola situación nos Centros Socioculturais. O concelleiro popular José Ramón de la Fuente exixiu á alcaldesa Goretti Sanmartín que dea explicacións públicas, que asuma persoalmente a xestión da crise e que garanta os postos de traballo e os dereitos laborais do persoal afectado. Segundo denunciou, o goberno local formado polo Bloque Nacionalista Galego e Compostela Aberta deixou de lado aos traballadores desde o inicio do mandato, malia as advertencias reiteradas do PP sobre a situación que atravesaban os centros. De la Fuente acusou o executivo municipal de pasividade e de evitar dar explicacións, asegurando que a situación era coñecida e que os traballadores “levan meses sufrindo e agora pagando a costa das súas propias nóminas”.
O edil popular puxo o foco tamén na xestión do contrato coa empresa Serviplustotal, ao afirmar que o goberno local continuou pagando as facturas con regularidade malia saber que non se estaban abonando as nóminas ao persoal. Ademais, reclamou aclaracións sobre o acordo alcanzado no outono de 2024 cando a empresa solicitou a rescisión do contrato e posteriormente retirou esa petición, e cuestionou a explicación ofrecida sobre a renuncia da nova adxudicataria. Segundo o PP, as débedas cos traballadores e os conflitos laborais xa eran coñecidos desde a fase de licitación. De la Fuente tamén preguntou polos atrasos na licitación, pola falta de penalización á concesionaria e pola tardanza na retención de pagamentos para garantir os salarios, e concluíu que, ante o que cualificou como “enésima crise” dos Centros Socioculturais, “só cabe a asunción de responsabilidades mediante dimisións”.
