O presidente da Xunta, Alfonso Rueda, asegurou que non descarta aumentar a partida que a Administración autonómica traslada ao Concello de Santiago en concepto de capitalidade e puxo en valor todo o investimento que o Goberno galego destina á cidade. Preguntado polas peticións da alcaldesa, a nacionalista Goretti Sanmartín, de aumentar estas partidas, o presidente da Xunta lembrou que este asunto xa foi abordado entre ambos na reunión mantida hai uns meses e incidiu en que esta partida “non é a única asignación” de fondos da Xunta que recibe o Consistorio.
Así, tras lembrar que Santiago recibe diñeiro a través do Fondo de Cooperación Local, a través do Consorcio, así como en investimentos concretos como o saneamento e actuacións en distintos puntos da cidade, asegurou entender esta reclamación “lexítima”, pero incidiu en que o “esforzo” da Xunta na cidade “está a ser importante”. “Non descarto un aumento, pero tamén reivindico para sucesivos orzamentos pór en valor todo aquilo que se está achegando e que se o levamos a unha suma global será unha cantidade importante”, sostivo. Ademais, tras recoñecer que o feito de que as instalacións da Xunta están situadas na cidade pode motivar “cargas adicionais”, dixo que iso tamén implica, “sen ningunha dúbida”, “beneficios a maiores”.
