A alcaldesa de Santiago, Goretti Sanmartín, anunciou este venres en rolda de prensa que o Concello activará a próxima semana unha nova canle na súa páxina web para solicitar reunións directas coa Alcaldía, dirixida á veciñanza a título individual. Con esta medida, o goberno local dá cumprimento ao compromiso de “abrir un tempo novo para que as persoas a nivel individual poidan ser recibidas directamente na Alcaldía”.
Segundo explicou a rexedora, as solicitudes realizaranse a través dun formulario electrónico “moi sinxelo”, que estará dispoñible desde a portada da web municipal santiagodecompostela.gal. A ferramenta entrará en funcionamento nos vindeiros días e permitirá canalizar as peticións de encontro de maneira ordenada.
Sanmartín destacou que esta iniciativa se insire na aposta municipal pola participación cidadá e a transparencia, e sinalou que xa puido constatar o interese xerado pola proposta. Neste sentido, indicou que “xa foron bastantes as persoas que a raíz do anuncio se dirixiron á Alcaldía por correo electrónico solicitando un encontro”, o que, ao seu xuízo, confirma a pertinencia da medida.
As reunións coa alcaldesa celebraranse os primeiros e terceiros xoves de cada mes, a partir do mes de febreiro. Estes encontros estarán dirixidos a persoas a nivel individual, que poderán trasladar directamente á rexedora preocupacións, demandas ou achegas de mellora relacionadas coa cidade.
Esta nova fórmula de participación vén sumarse ás diversas canles de diálogo que o goberno municipal mantén coa cidadanía compostelá e coas entidades representativas dos distintos ámbitos sociais.
No ámbito da participación e da transparencia, a alcaldesa anunciou tamén a convocatoria do debate sobre o estado do municipio, que terá lugar o xoves 12 de febreiro ás 12:00. Sanmartín lembrou que este debate está recollido no regulamento orgánico municipal, aínda que non sempre se celebrou con regularidade. “Nós cremos que é un xeito produtivo de dar conta do feito e do que queda por facer e, consecuentemente, convocamos o primeiro que nos correspondía”, sinalou, ao tempo que avanzou que xa hai data para un segundo debate no que se avaliará a xestión correspondente a 2025.
