O Grupo Municipal Socialista de Santiago de Compostela denunciou a ausencia de avances na reparación da cuberta da Escola Infantil de Tras Parlamento, unha infraestrutura educativa municipal que presenta problemas de filtracións de auga. A portavoz socialista, Marta Abal, lembrou que no pleno de xullo de 2024 foi aprobada unha moción presentada polo PSdeG co obxectivo de arranxar esta deficiencia.
Segundo explicou Abal, durante aquel debate plenario a responsable municipal de Educación, Míriam Louzao, recoñeceu a urxencia da intervención, anunciou unha partida económica de 176.000 euros e comprometeu a execución da obra para o verán de 2025. Porén, o grupo socialista asegura que, a día de hoxe, ese compromiso non se materializou.
Desde o PSdeG subliñan que a Escola Infantil de Tras Parlamento é un centro educativo “fundamental para Santiago”, polo que consideran prioritario resolver canto antes os problemas derivados das filtracións de auga. Neste contexto, Marta Abal sinalou que o incumprimento dos prazos anunciados xera incerteza tanto no persoal como nas familias usuarias do servizo.
Os socialistas avanzan que volverán pedir explicacións no ámbito municipal e cuestionan cando ten previsto o Goberno local acometer “dunha vez” a reparación da cuberta. A formación reclama que se concreten prazos e actuacións para garantir o correcto estado das instalacións e o funcionamento normal da escola infantil.
