A alcaldesa de Santiago de Compostela, Goretti Sanmartín Rei, presidiu unha nova sesión do Consello Municipal de Relacións Veciñais, un órgano concibido para fortalecer a interlocución directa entre o Concello e o movemento veciñal. No encontro participaron representantes do goberno municipal e das asociacións da cidade, nunha xornada centrada na convivencia, a mellora dos barrios e a coordinación das políticas públicas coa cidadanía organizada.
Durante a súa intervención, Sanmartín subliñou que “a participación non é un trámite, é unha maneira de gobernar”, incidindo na vontade do executivo local de consolidar canles estables de comunicación cos barrios. Pola súa banda, a concelleira de Relacións Veciñais, Pilar Lueiro, destacou a utilidade destes consellos para coñecer de primeira man as necesidades e propostas da veciñanza e avanzar nun traballo conxunto co tecido asociativo.
Un dos puntos centrais da sesión foi a presentación do Plan Horizonte Compostela, que conta cunha subvención de 8,7 millóns de euros destinada á transformación da zona noroeste da cidade, abrangendo ámbitos como Almáciga, Vite e Salgueiriños. Segundo se explicou, o plan busca impulsar actuacións orientadas a unha cidade máis sustentable, accesible e inclusiva.
No ámbito da vivenda, abordáronse cuestións como a declaración da Zona de Mercado Residencial Tensionado, o rexistro de soares, a cesión de parcelas municipais para a promoción de vivenda pública e a modificación do Plan Especial da Cidade Histórica, co obxectivo de preservar o uso residencial e favorecer o comercio de proximidade.
A concelleira de Turismo, Míriam Louzao, informou sobre a implantación do imposto sobre estadías turísticas, en vigor desde o mes de outubro. En materia de mobilidade, o goberno local deu conta da chegada do autobús urbano á Almáciga e do proceso de licitación do novo contrato de transporte urbano, que prevé a incorporación de novos vehículos e a mellora das frecuencias.
Tamén se trasladou información relativa á seguridade, a limpeza, a xestión da auga e diferentes actuacións urbanas e rurais en execución, así como sobre proxectos estratéxicos de transformación da cidade, entre eles o concurso internacional do Conector Central, o proxecto Entre Sar e Sarela e a nova iluminación de monumentos da cidade histórica.
Entre os fitos salientados figurou a devolución das estatuas do Pórtico da Gloria que estaban en mans da familia Franco, así como a presentación do informe do Foro de Turismo Sustentable. Ademais, acordouse a representación veciñal no Consello Municipal de Medio Ambiente e recolléronse propostas relacionadas con regulamentos, subvencións, seguridade, taxas e aparcadoiros.
