O concelleiro do Partido Popular en Santiago, Adrián Villa, reclamou este luns que o Concello reverta de inmediato a decisión que impide ao voluntariado acceder ao refuxio de Bando. O edil denunciou que desde finais de outubro estas persoas non poden realizar tarefas básicas de apoio, unha situación que, segundo explicou, repercute directamente no coidado dos máis de cincocentos animais acollidos nas instalacións.
Villa lembrou que o PP leva dous anos advertindo da situación do centro, primeiro polo aviso dunha “situación crítica” en xaneiro de 2024 e, un ano despois, por novos informes con incidencias trasladadas polo persoal. Segundo o concelleiro, estas condicións derivaron nun episodio no que un traballador resultou ferido polo ataque dun can, “un feito que, ao seu xuízo, non responde á agresividade do animal, senón á falta de recursos e protocolos adecuados”.
O edil tamén fixo referencia ao recente sacrificio de Gosu, cuxo proceso de adopción —apuntou— non foi trasladado ao Padroado. Villa asegurou que existían “informes favorables” para unha posible recondución do animal e culpou ao Goberno local de impedir que esa alternativa se chegase a valorar en tempo e forma.
A cuestión central da comparecencia foi, porén, o funcionamento do Padroado do refuxio, órgano do que forman parte representantes de varios concellos e entidades. Villa criticou que as últimas decisións se adoptasen “sen coñecemento dos catorce membros” e acusou á presidenta do Padroado, a alcaldesa Goretti Sanmartín, de actuar “sen consultar” e sen asistir presencialmente ás reunións.
Segundo explicou, na sesión celebrada o 5 de novembro, que se prolongou preto de tres horas, non se pecharon asuntos pendentes e quedou en suspenso unha nova convocatoria da que, indicou, aínda non teñen data. Por iso, anunciou que o Grupo Popular solicitará formalmente unha nova xuntanza.
Villa advertiu da repercusión do cambio de pechaduras, efectuado o 28 de outubro, medida que —afirmou— deixou ao voluntariado sen acceso ao recinto e fixo que desde media tarde ata primeira hora do día seguinte “non haxa ninguén que poida detectar incidencias nin atender necesidades básicas dos animais”.
O concelleiro concluíu pedindo ao Goberno local “transparencia e respecto institucional” e reiterou que o PP “non consentirá represalias contra persoas que realizan un labor altruísta”. A formación reclama que se restablezan de inmediato as condicións previas e que o Padroado recupere o seu funcionamento ordinario.
