A Asemblea de Sumar Terras de Compostela aprobou por unanimidade a súa nova dirección política, nun encontro extraordinario no que a organización puxo o foco na preparación das municipais de 2027 e na ampliación do espazo da esquerda na comarca. A candidatura encabezada por Carme Casado como secretaria comarcal e Luisa Pasín como vice-secretaria incorpora tamén a Rocío Núñez (Organización e Acción Institucional), Eli Cabeza (Mobilización), Aida Ferreiro (Comunicación) e Zé Martínez (LGTBIQA+).
Durante a sesión, Sumar Terras de Compostela fixou como prioridade estender a súa presenza a máis concellos da comarca e, especialmente en Santiago, impulsar unha candidatura ampla e plural da esquerda. Neste punto, a organización abriu a porta á participación de Mercedes Rosón, exconcelleira socialista, nun proceso de diálogo que din que “iniciarán nos próximos días”. O obxectivo, segundo destacaron, é artellar un espazo común no que tamén estean presentes Compostela Aberta e outras formacións progresistas.
A asemblea recoñeceu igualmente o labor dos actuais concelleiros María Rozas e Xan Duro, subliñando que “todo tipo de acordo debe darse co obxectivo de evitar un goberno do Partido Popular, xa que Borja Verea sería un novo Conde Roa”.
En materia programática, a organización sinalou que a vivenda continúa a ser o principal problema en Santiago, Ames, Teo e no resto da comarca. Aposta por combinar a declaración de zonas tensionadas con novas medidas para mobilizar vivendas baleiras e limitar a expansión das residencias estudantis privadas, unha proposta ligada á ILP que Movemento Sumar Galicia prevé presentar en breve.
