O Grupo Municipal Socialista levou ao Pleno deste xoves dous rogos dirixidos ao Goberno de Santiago para alertar do deterioro de varios espazos públicos nos barrios de San Martiño de Aríns e Rocha Vella. A concelleira Marta Abalasegurou que estas incidencias evidencian “un abandono continuado” por parte do executivo que lidera Goretti Sanmartín, e reclamou unha intervención inmediata nos dous puntos.
Segundo expuxo a edil, a senda peonil de San Martiño de Aríns acumula dende hai semanas unha gran cantidade de follas e restos vexetais que cobren o percorrido e dificultan o tránsito diario. Abal indicou que esta situación aumenta o risco de esvaróns e caídas, polo que considera necesario que se actúe canto antes para restablecer as condicións de seguridade.
O grupo socialista tamén chamou a atención sobre o estado das cunetas da Rocha Vella, onde observa unha presenza significativa de terra e maleza que reduce o paso e impide a correcta circulación da auga da chuvia. A formación solicita que se acometan traballos de limpeza e desbroce para evitar problemas de drenaxe e mellorar o mantemento xeral do vial.
A concelleira defendeu a presentación destes rogos como unha chamada de atención ao Goberno local, ao que pide que dea resposta ás necesidades de conservación no conxunto da cidade. “Compostela non pode ter veciñas e veciños de primeira e de segunda”, afirmou, ao tempo que apelou á importancia de garantir limpeza, seguridade e respecto pola veciñanza en todos os barrios do termo municipal.
