A alcaldesa de Santiago de Compostela, Goretti Sanmartín, fixo público este sábado un vídeo nas súas redes sociais no que invita ao novo alcalde de Nova York, Zohran Mamdani, a visitar a capital galega. A rexedora explica que lle dirixiu unha carta persoal para propoñer un encontro entre ambos co obxectivo de compartir experiencias de goberno orientadas ás maiorías sociais e ás políticas de transformación social.
Sanmartín sinala no vídeo que “todas aquelas persoas que estamos facendo un goberno para as maiorías sociais e loitando por un mundo máis xusto e igualitario” afrontan dificultades semellantes, en referencia ás resistencias e ataques que, segundo di, reciben os proxectos políticos que buscan cambios profundos. Por iso considera “bo” abrir un diálogo con Mamdani, co fin de intercambiar visións e aprendizaxes sobre os retos das cidades progresistas.
A alcaldesa engade que ambos poderían falar “das posibilidades, dos soños e das ideas” que se poden desenvolver “en cada territorio” para avanzar cara a modelos urbanos máis xustos. Sanmartín concluíu a súa mensaxe cun toque de humor, lembrando que “nestes momentos é doado facelo, porque hai voo directo a Nova York”, en alusión á nova conexión aérea coa cidade estadounidense.
