A portavoz de Industria do Grupo Socialista, Patricia Iglesias, acusou este mércores á Consellería de Industria de atrasar durante cinco meses o envío da documentación necesaria para que o Ministerio de Transportes puidese autorizar a ampliación do Polígono da Sionlla, en Santiago de Compostela. A parlamentaria presentou no Pleno do Parlamento galego os informes que, segundo afirmou, demostran que “foi a Xunta quen demorou o proceso”, e non o Goberno central, como sostivera o executivo autonómico.
Iglesias lembrou que o 3 de outubro, a directora xeral de Solo Industrial culpara ao Ministerio de non emitir a tempo un informe sectorial de autoestradas, argumento que a socialista cualificou de “rotundamente falso”. Explicou que o Ministerio solicitara o 23 de maio documentación complementaria á Xunta para completar a avaliación ambiental estratéxica, e que esta non foi enviada ata o 2 de outubro, un día antes da comparecencia da directora xeral na Comisión de Industria.
“A realidade é que o Ministerio fixo o seu traballo, e foi a Xunta quen tardou máis de cinco meses en enviar a documentación requirida”, sinalou Iglesias, quen pediu á conselleira do ramo que “depure responsabilidades políticas” pola “falta de veracidade” mostrada en sede parlamentaria.
A deputada advertiu de que a demora supón “meses perdidos pola ineficacia e descoordinación de Xestur coa Consellería de Industria”, e criticou o que cualificou de “maquillaxe e medias verdades para non render contas”. Engadiu que a Xunta está a ofrecer “nula colaboración institucional para un proxecto nuclear para Santiago”, que considera “un exemplo de libro dun fracaso na política de solo industrial”.
Iglesias tamén aproveitou a súa intervención para denunciar que Galicia presenta unha das peores taxas de ocupación de solo industrial do Estado, e que Xestur, “o principal promotor público galego”, se converteu nun organismo “burocratizado, lento e ineficaz, con perdas acumuladas ano tras ano”.
Por último, reclamou unha política industrial seria, transparente e planificada, afirmando que Galicia “non pode seguir perdendo oportunidades por culpa dun goberno que vive da foto mentres os polígonos se estancan e os investimentos marchan a outras comunidades ou ao país veciño”.
