A proposta dos populares a unha posble moción de censura na que se faría alcaldesa a Mercedes Rosón atopou unha resposta inmediata por parte da concelleira non adscrita, quen rexeitou de forma contundente calquera posibilidade de gobernar co PP. En declaracións a El Correo Gallego, a exconcelleira socialista asegurou que “xamais” formaría parte dun goberno de coalición cos populares e subliñou que “o PP coñece perfectamente” a súa postura.
Xamais, xamais, xamais.
A ver si desta queda claro. https://t.co/5sVjsqGXOc— Mercedes Rosón 🍉 (@mrosonf) October 9, 2025
Rosón, que foi concelleira de Urbanismo durante o mandato anterior e agora integra o grupo dos non adscritos tras a súa expulsión do PSOE, insistiu en que non contempla “baixo ningún concepto” participar nunha operación política deste tipo, afastando así, polo momento, a hipótese dunha alianza que permitiría sumar a maioría necesaria para unha moción de censura.
As súas palabras chegan despois de que o tamén exsocialista Gonzalo Muíños manifestase por primeira vez que os edís non adscritos só apoiarían unha moción de censura se Rosón encabezase o goberno, declaración que deu pé á oferta pública de Borja Verea. O portavoz do PP reiterou este xoves que a súa prioridade é “rescatar a cidade do caos do BNG e Compostela Aberta” e non “o sillón” da Alcaldía.
UNA SITUACIÓN “ESTRAÑÍSIMA”
A alcaldesa de Santiago, Goretti Sanmartín, cualificou de “estrañísima” a situación creada arredor das declaracións dos concelleiros non adscritos e a posterior oferta do PP para promover unha moción de censura. En declaracións difundidas pola Cadena SER, a rexedora apelou á “responsabilidade” e a non contribuír ao “ruído político”, insistindo en que o goberno municipal continúa centrado na xestión diaria. Máis tarde, reforzou esa mensaxe nas redes sociais cunha fotografía tomada no Pazo de Raxoi e o texto: “Seguimos traballando”.
Dende o PSOE local, o secretario xeral e deputado autonómico Aitor Bouza advertiu que o seu partido “nunca vai mercadear co PP” nin participar en movementos que “pervertan o resultado electoral” a través dunha moción de censura. “A ningún custo”, asegurou, subliñando que os socialistas composteláns non pactarán “nin directa nin indirectamente” co Partido Popular para facilitar un cambio de goberno no Concello de Santiago.
Pola súa banda, o Movemento Sumar Galicia expresou o seu apoio ao executivo municipal de BNG e Compostela Aberta, fronte ao que cualifican de “intento desesperado do PP por desestabilizar o goberno local”. Nun comunicado, o secretario xeral da formación, Paulo Carlos López, destacou que o actual equipo de goberno, “coas súas luces e sombras, garante un proxecto para a maioría social, con servizos públicos e participación veciñal”.
