O Grupo Municipal Socialista de Santiago reclamou ao Goberno local a aprobación inmediata dun protocolo específico para o manexo de animais potencialmente perigosos no refuxio municipal de Bando, despois de que un novo ataque deixase ferido a un traballador do centro. Trátase do segundo incidente en poucos días, o que, segundo os socialistas, “evidencia que a situación é insostible”.
A concelleira Marta Abal expresou o seu apoio ao traballador afectado e desexoulle unha rápida recuperación, ao tempo que lembrou as propostas presentadas polo seu grupo no último padroado. Entre elas, destacou a necesidade de aprobar con urxencia un protocolo de actuación e de implantar formación obrigatoria e especializada para o persoal que traballa coas e cos animais do refuxio.
O PSOE solicitará ademais que se convoque unha sesión extraordinaria do padroado de Bando para abordar a situación, aprobar o novo protocolo e garantir recursos destinados á formación. “Non se pode seguir mirando para outro lado”, advertiu Abal, que insistiu en que é responsabilidade do Goberno municipal “garantir de inmediato a seguridade das persoas e o benestar dos animais” no centro.
