O Partido Popular de Santiago advertiu dunha situación que considera “insostible” nos centros socioculturais da cidade, debido aos continuos atrasos na tramitación dos novos contratos de xestión. O concelleiro popular José Ramón de la Fuente asegurou que, despois de dous anos de anuncios por parte do goberno local, “a día de hoxe non foi publicado o expediente de licitación”.
Segundo De la Fuente, os actuais contratos “naceron mal” ao non estar “axeitadamente dimensionados nin técnica nin economicamente”, o que obrigou a prórrogas sucesivas. O edil sostivo que esta situación afecta tanto ás empresas concesionarias como aos traballadores, que “denunciaron impagos de nóminas”, e tamén aos usuarios, que “se queixaron das suspensións de actividades”.
O popular lembrou que xa en novembro pasado o executivo local reorganizou o departamento encargado da rede de centros, coa intención de mellorar o seu funcionamento, pero “sen resultados”. Ademais, indicou que en xuño se prorrogou de novo a vixencia dos contratos ata outubro, cun compromiso de resolver nese prazo a nova licitación. “Estamos a menos dun mes e medio de que rematen as prórrogas e nada sabemos da licitación dos novos contratos”, advertiu.
De la Fuente asegurou que o goberno local “xa sabe que non pode cumprir prazos nin compromisos, pero segue adiante con anuncios que non se materializan”. Neste sentido, avanzou que o inicio do novo curso podería verse condicionado pola falta de estabilidade contractual e non descartou novas suspensións de actividades nos centros socioculturais da capital galega.
Segundo o edil, a falta de avances evidencia unha “grave incapacidade de xestión” por parte do executivo nacionalista, que “mentiu en repetidas ocasións sobre a inminente publicación dos pregos”.
