A polémica pola ausencia da alcaldesa de Santiago, Goretti Sanmartín, no acto de entrega da Medalla de Galicia á princesa Leonor continúa xerando consecuencias políticas e mediáticas. Esta semana, a renuncia da xefa de Protocolo do Concello reavivou a controversia, e puxo de novo no foco unha publicación realizada en Facebook o pasado 12 de xullo polo concelleiro popular José Antonio Constenla, na que acusaba á rexedora de que a súa “ideoloxía radical pesa máis que o cargo”.
Aquela mensaxe, con máis dun cento de comentarios, incluía diversas críticas á decisión da alcaldesa de non acudir ao acto, mais tamén acumulou unha serie de intervencións de ton abertamente ofensivo ou despectivo. Entre elas, aparecen cualificativos como “cateta”, “impresentable”, “monicreque en mans dunha Bildu etarra”, “sirena bloqueira”, “ignorante” ou “caradura de libro”. A gravidade dalgúns destes termos foi destacada pola propia Sanmartín durante o pleno municipal do pasado mércores 31, no que sinalou directamente a Constenla por “avalar nas redes comentarios ofensivos” sobre ela. 
Efectivamente, a análise do fío de comentarios da publicación amosa que o concelleiro respondeu afirmativamente ou con entusiasmo a múltiples mensaxes que utilizan expresións insultantes ou cuestionan a dignidade institucional da alcaldesa. A usuarios que lle recomendaban “quedarse no gallinero”, e no que el respondía que a rexedora é unha “radical de tomo e lomo”, que propoñían directamente que “dimita xa” ou se referían aos membros do goberno como “bobos e lerdos“, Constenla replicou con frases como “totalmente de acordo”, “así é”, “siiiiiiiiiiiii”, “ten razón” ou “jajajaja, si señor”.
Un dos comentarios máis destacados foi o dun usuario que afirmaba que Sanmartín “é unha monicreque en mans dunha Bildu Etarra como a Sra. Pontón”, ao que o edil popular respondeu: “Así é, querido Ángel”. Tamén se sumou a críticas que cuestionaban a súa capacidade intelectual, con frases como “a indixencia intelectual expándese como un virus letal”, ante o que Constenla escribiu: “Así é, querido Julio!!!”
A publicación colleu aínda máis relevancia tras confirmarse esta semana a dimisión da xefa de Protocolo do Concello, que Sanmartín atribuíu a unha “mala comunicación” co seu gabinete no episodio da Medalla de Galicia. No mesmo pleno, o grupo municipal do PP levou a debate unha moción de reprobación contra a alcaldesa, que foi aprobada cos votos a favor dos populares, PSOE e edís non adscritos. No seu argumento, Constenla cualificou a decisión da rexedora como “un acto verdadeiramente miserable, sen precedentes e impropio de quen pretende liderar unha institución”.
Pola súa parte, a alcaldesa defendeu a súa postura como unha decisión coherente coa súa visión institucional e política, e denunciou o que cualificou como un “intento de criminalización do BNG” mediante campañas nas redes. Reivindicou tamén a existencia de “espazos institucionais para o republicanismo” e lamentou que a concesión da Medalla non fose acordada coas forzas políticas locais.
Dende o grupo popular, o edil respondeu negando tal implicación: “O primeiro que quero é amosar a miña sorprensa”, aseverou. “Nin sequera son consciente de que nas miñas redes sociais perdese 30 segundos en referirme a vostede. Se alguén lle informa de que nas miñas redes sociais eu falo de vostede, estana enganando”.
