A Unión Hoteleira de Compostela (UHC) manifestou de novo o seu “rexeitamento unánime” á implantación da taxa turística en Santiago, cuxa votación está prevista para este xoves no pleno do Concello. Nunha reunión celebrada este martes, os hostaleiros reforzaron a súa postura contraria ao tributo, a pesar do adiamento anunciado polo goberno local, que decidiu pospor a súa aplicación ata outubro tras dialogar co sector.
A UHC, que representa a maioría da planta hoteleira da cidade e máis de 1.000 empregos directos, considera que xa contribúe amplamente ás arcas municipais mediante impostos como o IBI, e que a medida penaliza os visitantes que pernoctan, ignorando os excursionistas ou grupos que saturan a cidade sen apenas consumo local.
A asociación cualifica a taxa de “inxusta”, “mal deseñada” e “precipitada”, advertindo que xera inseguridade xurídica tanto para os establecementos como para os visitantes, que poderían rexeitar o pagamento dun custo inesperado. Ademais, sinalan que a carga administrativa non debería recaer nos hoteleiros e critican a ausencia de control sobre outros modelos de aloxamento, como os pisos turísticos.
Defenden que o verdadeiro reto é a xestión eficiente do turismo, e non só a recadación, apostando por medidas que ordenen os fluxos, protexan a convivencia e reforcen os servizos públicos. Para a UHC, o turismo que dorme en Santiago non colapsa a cidade, senón que dinamiza a economía local.
O GOBERNO DE SANTIAGO “CONFÍA NA APROBACIÓN”
O goberno local de Santiago confía en que o pleno municipal aprobe este xoves a ordenanza da taxa turística, asegurando que a decisión de impulsala “está tomada”, malia o rexeitamento expresado por parte dos hostaleiros.
A concelleira de Capital Cultural e Turismo, Míriam Louzao, respondeu en rolda de prensa ás críticas da Unión Hoteleira de Compostela, lembrando que se atenderon todas as alegacións presentadas —sete en total— das cales cinco foron desestimadas. Subliñou que o presidente da UHC participou nas reunións mantidas e que os informes xurídicos avalan a legalidade da medida.
Louzao insistiu en que a proposta foi explicada aos grupos municipais e conta co apoio previo de BNG, Compostela Aberta, o PSOE e os catro edís non adscritos, mentres que o PP se abstivo. Por iso, agarda que a ordenanza volva recibir respaldo maioritario no pleno e que o debate social arredor da taxa evolucione “cara a un ton máis acougado”. A concelleira defendeu o dereito dos hostaleiros a discrepar, mais advertiu que a oposición ao imposto non impedirá a súa implantación.
