InicioPOLÍTICAO pleno de Santiago rexeita pagar case tres millóns de euros en...

O pleno de Santiago rexeita pagar case tres millóns de euros en facturas de transporte urbano

O PP e os concelleiros non adscritos impiden a aprobación do pago a TRALUSA e Autocares Rías Baixas, mentres o Goberno local defende que os servizos foron prestados

Publicado o

Xornal de Compostela

O Concello de Santiago de Compostela volveu atoparse cun bloqueo no pagamento de servizos xa prestados de transporte urbano. No pleno celebrado este xoves, a corporación municipal rexeitou aprobar dúas facturas pendentes por valor de preto de 3 millóns de euros, correspondentes ás empresas TRALUSA e Autocares Rías Baixas, actuais prestadoras das liñas do bus urbano compostelán.

A votación contou coa oposición do Partido Popular e a abstención dos concelleiros non adscritos, expulsados do grupo socialista, o que impediu sacar adiante os recoñecementos extraxudiciais de crédito. A situación repítese respecto ao pleno do pasado 3 de xuño, cando xa se freou o pago dunha das facturas, a correspondente á liña 7 do autobús.

En concreto, o Concello mantén unha débeda de 402.093 euros con Autocares Rías Baixas e outra de 2.537.725 euros con TRALUSA, empresa que opera a maior parte das liñas. Ambos pagos quedaron suspendidos pola falta de maioría suficiente no pleno.

Con todo, si se aprobou o recoñecemento doutras tres débedas por un importe próximo aos 447.000 euros, grazas á suma de votos do Goberno local (formado por BNG e Compostela Aberta) e do PSOE, coa abstención dos demais grupos.

Desde o Partido Popular, a concelleira Rosario Ferreiro advertiu que estes contratos se fixeron “sen fiscalización previa” e que se trata de “acordos de continuidade” adoptados sen informes técnicos independentes. Criticou tamén que non se acredita que os custos sexan acordes ao mercado, polo que o seu grupo valora elevar o caso aos órganos de control de responsabilidade contable e anticorrupción.

Pola súa banda, o portavoz popular Borja Verea advertiu que a situación podería derivar en responsabilidades patrimoniais para o Concello. Para os populares, o procedemento adoptado polo Goberno municipal incorre en “ilegalidade tras ilegalidade”.

Os concelleiros non adscritos, pola súa parte, aseguraron que a información ofrecida pola área de Mobilidade é “incompleta” e denunciaran no pleno anterior a “falta de diálogo”. Desta volta, sinalaron un “ocultismo” na xestión da regularización contractual do servizo de transporte urbano.

O edil Gonzalo Muíños criticou que se estea consolidando como norma o uso de recoñecementos extraxudiciais para facer fronte aos pagos. “Aquí teñen vostedes unha débeda máis elevada da que podería haber ao final de ano”, advertiu.

Desde o Goberno municipal, o concelleiro Xan Duro explicou que os expedientes para regularizar estas situacións foron iniciados en tempo e forma, pero se viron freados por “cambios no persoal” do departamento de Tráfico. Pola súa parte, a alcaldesa Goretti Sanmartín recoñeceu que non é unha situación desexable, mais defendeu que as decisións tomadas polo anterior Executivo tiveron como obxectivo evitar que a cidade quedase sen servizo de autobús.

“Tomáronse decisións para garantir o transporte colectivo. Non era unha disxuntiva doada: ou quedabas sen autobús ou buscabas unha fórmula que permitise manter o servizo”, sinalou a rexedora, quen instou aos grupos a “pagar un servizo que xa foi prestado á cidadanía”.

ÚLTIMAS

A illa de compostaxe do CIFP de Compostela culmina con éxito a súa primeira fase de funcionamento

A illa de compostaxe do Centro Integrado de Formación Profesional de Compostela xa tratou...

O CSIC crea un laboratorio pioneiro en Santiago para estudar a relación ancestral entre humanos e plantas

O Consello Superior de Investigacións Científicas (CSIC) avanza no seu proxecto 'PLANTCRAFT', que busca...

O persoal da limpeza do CHUS mobilízase contra Ilunion por vulnerar o contrato público

Decenas de traballadores do servizo de limpeza dos hospitais Clínico e Gil Casares de...

O empresario detido en Santiago está vinculado a unha rede de fraude na venda de bebidas alcohólicas

O empresario que foi detido pola Unidade Central Operativa (UCO) da Garda Civil o...

O Concello xa estuda as alternativas para proceder ao pago das facturas derivados do gasto do bus urbano

Os servizos técnicos do Concello de Santiago xa avalían todas as opcións posibles para...

O PP denuncia actos de vandalismo na súa sede e reclama ao BNG que condene os feitos

O Partido Popular de Santiago de Compostela denunciou hoxe publicamente os actos de vandalismo...

O BNG defende un parque público de vivenda baseado no alugueiro como resposta á crise habitacional

O Bloque Nacionalista Galego presentará este martes en Santiago de Compostela as súas propostas...