Hai exactamente doce meses escollemos esta data, símbolo de liberdade e dignidade, para darlle vida ao noso xornal. Non foi casualidade: o 25 de abril representa a esperanza, a resistencia e a vontade de cambiar as cousas dende abaixo. Co mesmo espírito, puxémonos a contar o que acontece en Santiago e arredores, coa intención clara de contribuír a unha sociedade mellor informada, máis crítica e máis consciente.
Dende Santiago de Compostela, apostamos por un xornalismo local que fale claro, que poña o foco no que acontece aquí, pero sen deixar de mirar o que acontece no mundo; porque entendemos a nosa profesión como un servizo público, como unha ferramenta que pode contribuír a defender a nosa terra, a nosa lingua e a dignidade das persoas que a habitan.
Neste tempo de inestabilidade económica, de discursos confusos e de valores que se desfiguran, nós seguimos apostando por facer xornalismo honesto, próximo. Facémolo dende a independencia máis absoluta: sen grandes medios nin estruturas, apoiándonos na vontade compartida de construír un xornalismo que poida marcar a diferenza. Sabemos que vivimos tempos difíciles, marcados pola incerteza económica, o ruído informativo e a perda de referentes comúns; por iso cremos que é máis necesario ca nunca manterse firme, cultivar a honestidade e escoitar con atención. Sabemos que a liberdade non é un punto de partida, senón un camiño que se constrúe todos os días, tamén dende o xornalismo.
Un ano despois, seguimos aquí. Con máis preguntas que respostas, pero co convencemento de que vale a pena seguir contándoo. Grazas a todas as persoas que nos ledes, compartides e nos animades a continuar.
Este aniversario non é unha meta, é só o inicio.
