Hai escasas semanas un clásico do cine de animación voltou á gran pantalla. Nausicaä do val do vento reapareceu para lembrarnos como a preocupación pola protección do medio ambiente, lonxe de ser unha moda pasaxeira, era xa no Xapón dos anos oitenta unha idea que movía conciencias e que cultivaba grandes éxitos no público xeral. Dez anos antes, o Informe sobre os límites do Crecemento encargado polo Club de Roma mostraba a incapacidade da humanidade para continuar gastando recursos escasos cunha pegada ecolóxica crecente. Estas e moitas outras investigacións e actos culturais forman parte dunha xenealoxía esquecida de traballos que nos ían alertando da crise ecolóxica na que nos atopamos actualmente.
Nesta situación, as cidades e o contexto urbano teñen moito que dicir sobre como nos adaptamos a un momento de cambios ambientais inusuais e como reducir o efecto destes cambios na poboación. Son múltiples e moi variadas as medidas políticas e sociais que se poden tomar neste eido, pero se hai unha serie de medidas que preocupan á cidadanía estas son as decisións ambientais que mitigan o efecto negativo do cambio climático na saúde das persoas.
No caso de Santiago de Compostela, a análise feita por IS Global en máis de mil cidades europeas devólvenos uns datos alentadores. A cidade sitúase como referente no estado español sendo a 3º urbe con maior área verde, que se estende por un 67% da superficie do municipio entre parques, prazas e xardíns. Isto incide directamente nunha menor mortalidade por falta de espazos verdes, sendo a 4º cidade máis sa no estado por razón das áreas verdes que protexen a súa poboación.
Pero cales son estas áreas verdes que sitúan a cidade no comio destes rankings?
En primeiro lugar hai que contar coas grandes extensións de monte que rodean a urbe de Santiago como son os do Pedroso ou o Monte do Gozo. Pero de seguido virannos á cabeza aqueles parques nos que todos os días agroma vida na cidade. Falamos de espaczos como os da Alameda, Bonaval, Belvís ou aqueles que rodean o Sar e o Sarela. Todos eles forman un tupido tecido verde que é tan extenso que só en Santiago se contabilizan 47 parques de máis de 10.000 metros cadrados. Da xestión encárganse simultaneamente a Universidade de Santiago, a Xunta de Galicia e o goberno municipal, que xestiona a maior superficie. Grazas a todos eles Compostela respira 500.000 metros cadrados de verdor.
Ademáis, Nacións Unidas recoñece, dende hai anos, o investimento en parques urbanos, espazos verdes e nos cursos de auga dunha cidade como unha das mellores ferramentas para mitigar o cambio climático e protexer a saúde da súa poboación. Pero os beneficios que brindan estes lugares non rematan aí. Pois estes lugares constitúen unha boa alternativa de ocio para toda a veciñanza e cobren a necesidade de pasear e socializar en espazos que nos xeran benestar emocional.
Así, os parques de Santiago de Compostela e a biodiversidade que agochan son o mellor tesouro que a cidade ofrece a propios e foráneos, só che falta descubrilos.
