O Goberno planea recolocar a Comisaría da Policía Nacional de Santiago en locais do barrio de Santa Marta para paliar temporalmente a ausencia da sede oficial. Esta solución durará ata que o edificio estea completamente rehabilitado tras o incendio que o deixou inoperativo en febreiro, o que será “cuestión de meses”. Estes plans avanzounos este mércores o delegado do Goberno, Pedro Blanco, no Foro Conversa, onde sinalou que se están a pechar os acordos para contar nuns días con espazos máis adecuados onde os axentes poidan traballar con absoluta tranquilidade.
Blanco preferiu non concretar o lugar elixido á espera de pechar todos os detalles e asegurar que as instalacións se adecúan ás necesidades operativas. Con todo, os locais estarán situados no barrio de Santa Marta. O delegado advertiu de que a reforma do inmoble na avenida de Rodrigo de Padrón levará tempo en base aos danos observados nunha visita realizada pola Delegación do Goberno en días pasados, polo que a mudanza temporal é necesaria para garantir o servizo na capital galega.
