Coa chegada do mes de xuño e da calor chega tamén esa época do ano na que centos de estudantes din adeus ás súas facultades, na que se despiden dos seus compañeiros e profesores e na que comeza unha nova etapa das súas vidas. Despois de meses estudando para os exames finais e preparando os seus Traballos de Fin de Grao, chega o que para moitos é o broche final para a súa vida universitaria: a graduación.
Santiago é, para estes estudantes, a cidade que os acolleu e na que construíron unha nova vida e novas relacións. Despois de, como mínimo, catro anos vivindo aquí, ten sentido que queiran despedirse por tódolo alto.
Porén, hai un factor das graduacións que nunca deixa de sorprender: os prezos dos espazos e das cenas. Dalgunha forma, ao longo dos anos foise normalizando que cada estudante teña que pagar máis de 80€ se quere cear co resto da súa clase e co profesorado. Eso se non participa nos pinchos e se non leva a ningún acompañante. Se tes a sorte de formar parte dunha promoción con moi poucos graduados, ao igual podes atopar un menú máis preto dos 50€, pero para carreiras como mediciña, física ou farmacia os prezos por persoa aproxímanse máis aos 100€.
Sabendo o nivel económico da meirande parte do estudantado, así coma a tolemia que son os alugueres na cidade, esperar que fagan un gasto desas dimensións se queren formar parte do que é para moitos unha noite única faise un tanto irreal.
Entendendo que os servizos de cátering así coma os alugeres dos espazos non poden saír de balde, resulta algo sorprendente a falta de ofertas para estudantado. Da mesma forma que podes alugar o teu espazo por prezos diferentes en función de se se vai realizar unha boda ou unha reunión importante, a escaseza de ofertas e packs orientados a ofrecer estes servizos aos recén graduados é impactante. Sobre todo se temos en conta a tradición de Santiago como cidade universitaria.
Tras anos de estudo, esforzo e traballo duro, unha graduación debería ser un momento de celebración para todo o alumnado, independentemente do seu nivel económico.
