Este luns celebrouse unha reunión solicitada polas traballadoras e o sindicato de Beatriz Seijo Art Studio + Gallery para tratar de alcanzar un acordo sobre as melloras nas condicións laborais e salariais do persoal. Sen embargo, segundo informaron fontes sindicais, non se produciron avances significativos.
Entre as principais demandas das traballadoras están o recoñecemento da categoría profesional con carácter retroactivo, a equiparación salarial e a eliminación da fenda de xénero, ademais do cumprimento da normativa de xornada e rexistro horario. Tamén solicitan a redución das ratios nas actividades formativas, un plan de igualdade e outro de formación.
Outra das reivindicacións é o recoñecemento da relación laboral dunha traballadora despedida que, segundo denuncian, estivo máis dun ano en situación de “falsa autónoma”. O sindicato tamén esixe que a empresa non vulnere o dereito á folga, tal como denunciaron a semana pasada ante a Inspección de Traballo.
As traballadoras tamén reclaman que se corrixan as datas dos chamamentos das fixas discontinuas, que consideran que deberon estar dadas de alta desde o comezo do curso. Durante a reunión, o sindicato subliñou que estas cuestións son “liñas vermellas” para desconvocar a folga, á espera dunha resposta por parte da empresa.
NOVAS ACCIÓNS DE PROTESTA
Ante a falta de ingresos tras 15 días en folga, o persoal activará un ‘crowdfunding’ e realizará novas accións de protesta, como unha “NON festa de fin de curso” o sábado 28 no parque de Santa Marta, e unha aula aberta o martes 1 de outubro, onde explicarán a súa situación á comunidade educativa.
