A catedrática de Óptica e candidata á Reitoría da USC, Maite Flores, anunciou que proporá ao Consello Social o nomeamento de Xosé Antón Freire Ramos como novo xerente da institución no caso de resultar elixida nas eleccións previstas para o día 11.
A aspirante avanzou esta decisión nun comunicado no que explicou que, de obter o apoio maioritario da comunidade universitaria, impulsará unha nova estrutura xerencial de carácter profesional e estratéxico coa finalidade de liderar o proceso de modernización administrativa da universidade compostelá.
TRAXECTORIA VINCULADA Á USC E Á ADMINISTRACIÓN LOCAL
Xosé Antón Freire é licenciado en Filosofía e Ciencias da Educación (Psicoloxía) pola propia USC e conta cun Diploma en Estudos Avanzados de Psicoloxía Social, un Máster en Psicoloxía Xeral Sanitaria e un Diploma de Persoal Directivo Profesional.
Ao longo da súa carreira desenvolveu diferentes responsabilidades dentro da universidade, entre elas as de vicexerente do Campus de Lugo e da Área Económica entre 2007 e 2010, vicexerente de Economía e Infraestruturas entre 2018 e 2022 e director da Área de Xestión da Investigación entre 2022 e 2023.
Desde 2023 ocupa un posto directivo no Concello de Santiago, ligado á coordinación e á modernización da administración local.
Maite Flores sinalou que o perfil de Freire responde ao modelo que considera axeitado para asumir a xerencia. “Eu sempre dixen que, para min, o perfil ideal para ocupar a xerencia era unha persoa cunha visión externa, pero cun profundo coñecemento da casa e penso que non hai mellor perfil que o de Xosé Antón para cumprir ambas as dúas cualidades”, afirmou.
A candidata destacou tamén que “a súa traxectoria tanto dentro da USC como na Administración Local e o seu talante moderado e dialogante son a súa mellor tarxeta de presentación”.
Flores anunciou igualmente que se integrará na nova estrutura xerencial José Ramón Basante Barbazán, traballador da USC que desde abril do pasado ano exerce como xefe do Servizo de Orzamentación e Planificación na Área de Xestión Económica.
Basante é graduado en Relacións Laborais e Recursos Humanos, diplomado en Relacións Laborais e conta coa titulación de técnico especialista en informática de xestión.
“A ambos os dous agradézolles o xesto valente de dar un paso á fronte neste momento, demostrando o seu compromiso coa USC e a confianza en que é posible un cambio para imprimirlle aires novos”, subliñou Flores. Engadiu que a súa incorporación responde á vontade de avanzar “na transformación dixital, por fortalecer as alianzas no conxunto do ecosistema de universidades públicas e pola introducción da perspectiva da innovación en todos os procedementos”.
Segundo explicou a candidata, a futura estrutura xerencial configurariase como un órgano directivo profesional encargado de impulsar unha xestión dixital, simplificada e baseada en datos, co obxectivo de garantir a eficiencia administrativa, a seguridade xurídica e a excelencia no servizo á comunidade universitaria.
“A nova estrutura xerencial vaise configurar como un órgano directivo profesional e estratéxico, que vai liderar a modernización administrativa da USC para que volva ser un referente”, afirmou, destacando que o modelo proposto aposta por unha gobernanza “transparente, dialogante, colaborativa e orientada a resultados”.
A proposta deberá ser elevada ao Consello Social no caso de que Maite Flores resulte elixida reitora nas votacións convocadas para o día 11.
