A organización estudantil Erguer fixo público este sábado un vídeo nas súas redes sociais no que manifesta o seu rexeitamento á celebración dunha xornada na Facultade de Dereito da Universidade de Santiago de Compostela (USC) coa participación de representantes da Garda Civil e do Corpo Nacional de Policía.
Segundo a información facilitada a Xornal de Compostela por parte de Erguer, o acto celebrouse o día anterior na Sala de Xuntas do centro e consistiu na presentación do libro Las entidades locales frente al reto de la ciberseguridad. A convocatoria, dirixida ao estudantado de Dereito, indicaba que intervirían un membro da Garda Civil e outro do Corpo Nacional de Policía, así como o profesor Luís Míguez Macho, e ofrecía a posibilidade de obter un certificado de asistencia mediante inscrición previa.
No vídeo publicado, Erguer afirma que a Facultade de Dereito está a ser “captada polos discursos españolistas e, portanto, polo autoritarismo militarista”. A organización considera “inadmisíbel” a “normalización e integración na USC das Forzas e Corpos de Seguridade do Estado”, e sostén que a universidade pública debe garantir “aulas libres de discursos reaccionarios que nos negan como nación”.
O sindicato tamén rexeita a intervención do profesor Míguez Macho, ao que atribúe posicionamentos que, segundo expresa, “negan realidades e dereitos fundamentais como a diversidade ou o uso da nosa propia lingua”. No mesmo vídeo, Erguer sinala: “Non imos permitir a intromisión na Universidade Pública das Forzas de Ocupación Española nin da retórica fascista”.
Na mensaxe de convite remitida ao alumnado, á que tivo acceso este medio, indicábase que a actividade podería resultar de interese para o estudantado e facilitábase información sobre o programa da xornada, así como unha ligazón para formalizar a inscrición. O texto estaba asinado cun “Un saúdo afectuoso” e facía referencia expresa á participación do profesor Míguez Macho e doutros relatorios.
Erguer defende que a USC debe ser “un espazo de pensamento crítico, plural e obxectivo” e cuestiona que este tipo de iniciativas contribúan a ese obxectivo. Polo momento, non transcendeu ningunha valoración pública por parte da Facultade de Dereito nin da propia universidade sobre as críticas formuladas polo sindicato estudantil.
OUTRO ENCONTRO CON PRESENZA MILITAR EN FARMACIA
Este posicionamento súmase a outra protesta protagonizada por Erguer o pasado 5 de febreiro, cando denunciou a celebración dunha palestra na Facultade de Farmacia da Universidade de Santiago de Compostela baixo o título ‘Sanidade militar como oportunidade de saída laboral’. Segundo trasladou a organización, parte do estudantado tivo que asistir “case de xeito obrigatorio” a unha sesión impartida polas forzas armadas.
O sindicato estudantil sostivo que esta actividade incumpriría o artigo 4.9 dos estatutos da USC, que establece que a institución non colaborará no desenvolvemento de proxectos con fins armamentísticos ou bélicos, e cualificou a iniciativa de “propaganda” vinculada a unha estratexia do Ministerio de Defensa. Naquel comunicado, Erguer afirmou que “a universidade debe ser un lugar de pensamento crítico, non unha plataforma ao servizo dos intereses bélicos do Estado”, e criticou o que considera unha normalización de discursos militaristas nos espazos educativos.
