Unha trintena de persoas concentrouse este sábado na praza do Obradoiro, en Santiago de Compostela, para denunciar a actuación policial contra un grupo de manifestantes tras a marcha pola vivenda do 11 de novembro, durante a folga xeral. A protesta tivo lugar entre as tendas da acampada e a Catedral, tres días despois de que unha moza de 19 anos fose trasladada ao hospital tras os feitos ocorridos na rúa das Trompas, xunto ao parque de Belvís.
A acampada do Obradoiro, que difundiu a convocatoria nas redes sociais, sostén que varias persoas quedaron “encerradas entre dous furgóns” e que os axentes que baixaron dos vehículos as golpearon contra a parede. Segundo a convocatoria, as persoas afectadas coinciden en que a intervención tiña como finalidade agredilas e que os policías non procuraban identificalas.
Miguel García, un dos asistentes á concentración deste sábado, explicou a Europa Press que, ao remate da manifestación do mércores, parte dos participantes continuou ata o Obradoiro, onde fixo unha sentada pacífica. Unha vez disolta, algunhas persoas dirixíronse á praza de Cervantes para realizar piquetes informativos nos comercios que permanecían abertos.
Segundo García, naquela altura quedaban unhas 20 ou 30 persoas, repartidas en pequenos grupos. O mozo sitúa a aparición de varios furgóns policiais no momento en que saían da praza de Abastos e baixaban cara á Virxe da Cerca. Ao ver os vehículos, botou a correr por outra rúa. García tamén denunciou o sucedido nun vídeo en ‘Instagram’.
Outras persoas baixaron pola rúa das Trompas, ata onde chegaron os furgóns. O relato de García e o manifesto lido na concentración deste sábado sitúan nese punto a intervención. Segundo ambas as versións, os axentes bloquearon o paso ao grupo, obrigaron os seus integrantes a colocarse contra a parede e golpeáronos.
O 061 confirmou a Europa Press que un equipo sanitario trasladou en ambulancia unha moza de 19 anos ao Complexo Hospitalario Universitario de Santiago (CHUS) preto das 22:00. García, que afirma coñecela, indicou que lle puxeron grapas na ferida e que xa recibiu a alta hospitalaria.
A Policía Nacional, consultada por Europa Press, sinalou que o sucedido en Belvís quedou fóra da reunión na que se avaliou o desenvolvemento da folga. Segundo as mesmas fontes, a conclusión desa reunión foi que a xornada rematou en Galicia sen incidentes de especial relevancia.
A PROTESTA TAMÉN DENUNCIA AS CARGAS EN AMIO
Na concentración do Obradoiro, as persoas asistentes alertaron dunha “escalada da violencia policial” durante a folga e denunciaron tamén as cargas nos piquetes informativos de Amio, a primeira hora da mañá do mércores.
Entre os cánticos escoitáronse “Policía culpable, Goberno responsable”, “Ningunha agresión sen resposta” e “Abaixo a ‘lei mordaza’, queremos volver a casa”. Nunha pancarta podía lerse “Contra o Estado policial, autodefensa radical”, un lema que tamén corearon os asistentes. A acampada xa empregara esa pancarta nunha mobilización polas cargas policiais rexistradas na Coruña durante unha visita do líder de Vox, Santiago Abascal.
O SINDICATO DE VIVENDA PIDE IDENTIFICAR OS AXENTES
O Sindicato de Vivenda de Compostela, que formou parte do comité de folga, xa expresara o xoves o seu rexeitamento á actuación policial do 11N. Nun comunicado, cualificou o sucedido en Belvís de “agresión deliberada e covarde” e denunciou un “intento de carga” ao remate da manifestación.
A organización asegura que mantivo a comunicación e colaborou coa Policía Nacional desde o inicio da xornada. Segundo o sindicato, tras a lectura do manifesto da tarde, os axentes prepararon o equipamento antidisturbios, incluídas as armas para disparar pelotas de goma e os gases lacrimóxenos. No mesmo texto, a entidade tamén denunciou o que considera “manipulacións mediáticas”.
O sindicato reclama que se identifique os axentes implicados, se depuren responsabilidades e se arquive calquera denuncia ou sanción contra as persoas manifestantes. A entidade comprométese a acompañar as afectadas nas mobilizacións e nos xulgados.
