As persoas mozas acampadas na Praza do Obradoiro, en Santiago de Compostela, atribúen á “violencia rentista” a morte de Maricarmen Abascal, convertida en símbolo da loita pola vivenda tras o seu desafiuzamento, e cualifican o sucedido de “asasinato”.
“Non imos permitir ningún asasinato máis por parte do rentismo”, advertiu un dos seus portavoces, Iker, que compareceu este xoves ante os medios de comunicación. A noticia coñecérona durante a tarde do día anterior cunha “mestura de rabia e impotencia” que, nas súas palabras, levan sentindo “desde hai anos” e non só desde hai unha semana, cando montaron a acampada.
“Son anos nos que a nosa clase está condenada á miseria e á morte polo lucro duns poucos. E témolo claro: para nós isto acabou”, expuxo. Neste contexto, situou a Maricarmen como “unha vítima máis da violencia rentista”, ao igual que outras “milleiros de persoas” que pasaron por situacións semellantes en España.
Tamén culpou disto un sistema político que, ao seu ver, “ampara e protexe os rentistas e os empresarios” e que “patrocina” as mortes da clase traballadora. “Foron milleiros as persoas asasinadas polo rentismo e seguirano sendo se non cambiamos esta situación”, recalcou. Este portavoz das persoas acampadas chamou a toda aquela que sinta “rabia ou tristura” a organizarse, sumándose ás acampadas, ás organizacións políticas ou aos sindicatos máis próximos: “Loitade e militade contra este mundo de barbarie que se nos presenta“. Precisamente, considera que ese é o “mellor homenaxe” a Maricarmen Abascal, aínda que non descarta que a acampada lle dedique nalgún momento concreto.
UNHA SEMANA DE ACAMPADA
A noticia do falecemento de Maricarmen Abascal coincidiu co feito de que se cumpría unha semana desde o inicio da acampada, que comezou na madrugada do 30 de setembro ao 1 de outubro. Desde ese momento, o asentamento non deixou de medrar día a día. Na actualidade, as persoas responsables cifran en 120 as tendas instaladas nesta emblemática praza.
Iker cre que a “insostibilidade” da crise da vivenda está a provocar que as mobilizacións sexan “masivas” en toda España, tamén en Galicia, e vaticinou que a acampada seguirá medrando en número. “Non imos permitir que haxa outra Maricarmen, nin outra Olga, nin que ninguén volva sufrir violencia rentista”, resolveu.
