Compostela acolleu este domingo unha manifestación en defensa dos dereitos do colectivo trans, que partiu ás 12:00 da Praza 8 de marzo e percorreu distintas rúas do centro urbano ata rematar na Praza do Obradoiro. A mobilización avanzou por Virxe da Cerca, praza de Galicia, rúa da Senra e rúa do Vilar, para concluír descendendo por Fonseca, nunha xornada marcada pola presenza de consignas reivindicativas e pola lectura dun manifesto colectivo.
Durante o percorrido, as persoas participantes corearon lemas como “Aquí está, aquí se ve, o transfeminismo galego en pé”, “As infancias trans existen e resisten”, “Rueda, escoita: o transfeminismo está en loita” ou “Imos queimar a Conferencia Episcopal, por machista e patriarcal“, entre outros, nun contexto de denuncia da transfobia e de reivindicación de dereitos.
Ao comezo da marcha, Alicia Arruti, portavoz da mobilización, explicou a Xornal de Compostela que a convocatoria responde a múltiples motivos, entre eles o incremento de agresións recentes. “Hoxe estamos aquí con motivos máis que de sobra polo aumento de agresións que estamos vendo”, sinalou, facendo referencia a casos ocorridos nas últimas semanas. Tamén destacou a situación de persoas non binarias e migrantes, que, segundo indicou, afrontan “unha dobre discriminación”, así como as dificultades administrativas para o cambio de documentación.
Arruti referiuse tamén á situación en Galicia, onde asegurou que “o Partido Popular de Galicia e a Xunta están ignorando as nosas peticións”, e reclamou a actualización do protocolo educativo conforme á lei estatal aprobada en 2023.
Outras persoas participantes coincidiron en sinalar a necesidade de avanzar en dereitos e recoñecemento social. Unha das testemuñas indicou que a mobilización busca “axudar ao colectivo a mellorar as nosas condicións e que a lei nos protexa máis”. Outra participante apuntou que, malia percibir avances, “ainda queda moito camiño que facer” en ámbitos como o laboral e o social. Tamén se fixo fincapé na importancia da visibilidade e do apoio social, destacando que o colectivo precisa “dar visibilidade, dar apoio, dar amor”.
Xa na Praza do Obradoiro, a organización leu un manifesto no que se subliñou a necesidade de manter a mobilización social para preservar os dereitos conquistados. O texto advertiu contra o risco de retrocesos e defendeu que “os dereitos se defenden tamén nas rúas”.
O documento abordou diferentes realidades dentro do colectivo, como a situación das persoas trans migrantes e racializadas, que “sofren unha dobre discriminación”, ou a falta de recoñecemento legal das persoas non binarias. Tamén denunciou a situación das infancias trans menores de 12 anos, que, segundo indicaron, non están plenamente recoñecidas pola normativa actual.
Entre as demandas recollidas no manifesto figuran a protección legal efectiva, o acceso á sanidade, educación e emprego, a reforma do protocolo educativo en Galicia, a formación en identidade de xénero para profesionais e o recoñecemento legal das persoas non binarias e menores. Ademais, reclamouse a implementación de políticas públicas que garantan dereitos e freen os discursos de odio.
A mobilización contou co apoio de numerosas organizacións sociais, sindicais e políticas, que se adheriron ao manifesto. A xornada concluíu no Obradoiro cun chamamento á continuidade da loita colectiva baixo a premisa de que “os dereitos trans son dereitos humanos”.
