O pleno municipal de Santiago de Compostela aprobou esta tarde unha proposición presentada polo grupo municipal do Partido Popular para elaborar unha normativa específica sobre a colocación de pancartas, carteis e outros soportes no espazo público, nunha sesión marcada por un debate intenso con reproches entre os grupos da corporación. A iniciativa saíu adiante cos votos favorables do PP e das concelleiras non adscritas, mentres que o goberno local (BNG e Compostela Aberta) votou en contra e o PSOE optou pola abstención.
Durante a defensa da proposta, o concelleiro popular José Antonio Constenla sostivo que a cidade presenta unha “ausencia de regulación clara” que, ao seu xuízo, provoca desorde no uso do espazo público. Segundo indicou, a iniciativa pretende “non prohibir, senón ordenar”, establecendo criterios sobre localizacións, prazos ou condicións para a instalación destes elementos. Ademais, advertiu do que cualificou como unha “colonización ideolóxica do espazo público” e pediu garantir a “neutralidade institucional”.
Desde o grupo de concelleiras non adscritas, Mila Castro anunciou o seu apoio á proposta, aínda que expresou discrepancias co enfoque do PP. Na súa intervención, sinalou a necesidade de “poñer orde neste asunto para evitar a arbitrariedade”, ao tempo que cuestionou os criterios na retirada ou mantemento de determinados carteis. Tamén lembrou que o Concello xa anunciara a creación de espazos habilitados para cartelería, unha medida que, segundo indicou, aínda non se materializou.
Pola súa banda, o goberno local rexeitou a proposta ao considerar que xa existe normativa suficiente. O concelleiro de Compostela Aberta, Xan Duro, defendeu que a colocación de pancartas e carteis está regulada en distintas ordenanzas municipais e afirmou que a cuestión exposta polo PP responde máis ao contido das mensaxes que á súa regulación. “Existe unha regulación en vigor”, sinalou, ao tempo que explicou os procedementos de autorización e os criterios aplicados polo Concello.
Nunha liña semellante, o portavoz socialista Gumersindo Guinarte indicou que a normativa actual xa contempla limitacións e condicións para este tipo de instalacións, aínda que recoñeceu que está dispersa. Así, considerou que o principal problema reside na súa aplicación e non na súa inexistencia, e advertiu de que a liberdade de expresión debe prevalecer, salvo en casos que vulneren a legalidade.
O debate elevou o ton na segunda quenda de intervencións, con acusacións mutuas entre representantes do PP e do goberno local sobre a interpretación das autorizacións e o cumprimento das normas, o que levou á alcaldesa, Goretti Sanmartín, a intervir para reconducir a sesión.
Finalmente, a proposta foi aprobada, polo que o Concello deberá abordar a elaboración dunha normativa específica sobre a colocación de pancartas e carteis no espazo público, nun contexto de discrepancia política sobre a necesidade e o alcance desta regulación.
