Decenas de miles de persoas participaron este domingo en Santiago de Compostela nunha manifestación en contra do proxecto industrial de Altri e da mina de Touro-O Pino, nunha convocatoria que deu comezo ás 12:00 na Alameda e rematou na Praza do Obradoiro. Segundo indicaron as entidades organizadoras, cando a cabeceira da marcha chegou ao centro histórico aínda había xente que non saíra da Alameda, o que evidenciou a dimensión da mobilización.
A protesta reuniu plataformas sociais, colectivos veciñais e representantes políticos nun percorrido que volveu situar no debate público o impacto ambiental e territorial destes proxectos na comarca de Santiago e no conxunto de Galicia. Durante o acto final, as plataformas convocantes advertiron das consecuencias que poderían ter estas iniciativas sobre os recursos naturais e sobre os sectores produtivos ligados á terra e ao mar.
Dende a organización puxeron o foco no papel do río Ulla como eixo estratéxico para o abastecemento de auga, ao lembrar que fornece a varios concellos e a unha parte significativa da poboación, así como na relevancia económica, social e ambiental da ría de Arousa. As plataformas alertaron de que a posta en marcha de Altri e da mina de Touro podería comprometer de maneira irreversible estes ecosistemas, motivo polo que insistiron en que a mobilización cidadá seguirá activa. Segundo trasladaron, a presión social foi determinante para que, polo momento, ningún dos dous proxectos estea en funcionamento.
A portavoz da plataforma Ulloa Viva, Marta Gontá, sinalou que a mobilización se produce un ano despois doutras protestas multitudinarias para reiterar o rexeitamento á instalación dunha macrocelulosa no interior de Galicia. Defendeu que a veciñanza continuará defendendo o territorio no que vive e situou na Xunta de Galicia a responsabilidade de pechar definitivamente un proxecto que, ao seu xuízo, condiciona o futuro da zona.
REACCIÓNS POLÍTICAS
No ámbito político, a portavoz nacional do BNG, Ana Pontón, participou na mobilización e reclamou ao presidente da Xunta que atenda o que cualificou como un clamor social contra Altri. Pontón defendeu un modelo industrial baseado en iniciativas compatibles coa protección do medio ambiente e sostivo que Galicia debe apostar por industrias propias do século XXI, afastadas de proxectos que, segundo indicou, hipotecan o futuro do país.
Pola súa banda, o portavoz de Sumar Galicia, Paulo Carlos López, destacou que o Estado xa manifestou a súa negativa a apoiar economicamente o proxecto e a autorizar infraestruturas clave para a súa viabilidade, como a conexión eléctrica. Indicou que a formación seguirá traballando desde o ámbito institucional para paralizar definitivamente a iniciativa e reclamou á Xunta un rexeitamento explícito, ao tempo que pediu ás autoridades europeas a revisión das certificacións concedidas, ao aludir a posibles irregularidades na documentación presentada.
A portavoz socialista Lara Méndez, asistiu tamén á manifestación e reiterou o posicionamento contrario do seu partido ao proxecto de Altri e á mina de Touro-O Pino. Méndez subliñou que o Goberno central rexeitou en varias ocasións as axudas solicitadas pola empresa e defendeu que a contestación social debe ir acompañada de decisións desde as administracións para impedir a execución dunha iniciativa que cualificou de macrocelulosa.
