A Rede Galega de Estudantes e Persoal Investigador Predoutoral de Farmacia (REGEIFAR) valorou este mércores con “moderada satisfacción e prudente optimismo” o acto de colocación da primeira pedra da Cidade da Saúde da USC, que acollerá a futura Facultade de Farmacia, no Campus Sur de Santiago. O evento, no que participou o presidente da Xunta de Galicia, marcou o inicio das obras da primeira fase dun proxecto longamente demandado pola comunidade universitaria.
Dende a rede lembran que o inicio das obras chega “moi tarde” e que “o compromiso político coa nosa Facultade segue a ser insuficiente”. Subliñan que dende o peche do pavillón de aulas en 2016, o centro leva case dez anos sen unhas instalacións docentes propias, coa consecuente dispersión do alumnado por distintos edificios da USC “en condicións moi afastadas da idealidade”.
REGEIFAR atribúe boa parte deste atraso á falta de compromiso institucional da Xunta, que “demorou a súa solución financeira” ata o pasado ano, cando Alfonso Rueda anunciou a reestruturación dunha parte da débeda da universidade para liberar fondos destinados ás obras. A licitación, prevista inicialmente para abril de 2024, non se produciu ata febreiro de 2025.
A organización lembra tamén que esta primeira fase do proxecto inclúe aulas, laboratorios de prácticas, biblioteca, espazos administrativos e despachos, pero que a Cidade da Saúde abrangue dúas fases máis: a segunda, coa futura Facultade de Enfermaría, e unha terceira centrada nun centro de investigación biomédica. Sobre esta última, REGEIFAR advirte de que o edificio previsto “non garante espazo suficiente nin as condicións adecuadas” para a totalidade dos grupos de investigación que actualmente operan en Farmacia.
Pese ás críticas, a rede cualifica o acto como “un momento significativo” e manifesta o seu compromiso de seguir vixiando o cumprimento dos prazos e a dotación de recursos prometidos. “A Facultade de Farmacia merece moito máis ca simbolismos: precisa compromiso, investimento e feitos”, conclúe o comunicado, no que reivindican un futuro digno para o ensino e a investigación farmacéutica galega.
