A asociación Abeiro, que agrupa voluntariado e persoas colaboradoras coa defensa e protección dos animais en Santiago, anunciou que a demanda polo caso de Gosu está xa practicamente lista e que agardan poder presentala nos próximos días. O colectivo mantén que as decisións que levaron ao sacrificio do can son “profundamente reprobábeis” e que haberá que depurar responsabilidades e ofrecer explicacións pola negativa a permitir a súa adopción, a única alternativa que, segundo subliñan, podería terlle salvado a vida.
Con todo, a asociación fixo un chamamento á calma e ao respecto tras detectar insultos e ameazas nas redes sociais cara ás persoas consideradas responsábeis do suceso. “Insultos, ameazas e calquera comportamento violento non son o camiño”, advirte o colectivo, que condena “firmemente ese tipo de actitudes” e insiste en que a falta de respecto “só dificulta o camiño e resta forza á causa”.
Dende Abeiro subliñan que a súa prioridade é que o proceso se desenvolva polos cauces legais e institucionais, a través dos órganos do padroado que se reunirán proximamente e mediante a demanda que xa están a preparar.
O colectivo lamenta tamén as represalias internas e a manipulación do relato que, segundo denuncian, se estarían a producir para “xustificar o inxustificable”, incluíndo a expulsión de persoas voluntarias vinculadas ao caso. A asociación conclúe pedindo “cordura, empatía e serenidade”, convencida de que só dende o respecto e a unidade se poderá acadar xustiza para Gosu.
