O persoal do Servizo de Prevención e Defensa contra Incendios Forestais (SPIF) sairá este xoves ás rúas de Santiago de Compostela para reclamar un servizo “público, digno e con garantías laborais”. A manifestación, convocada pola CIG-Administración Autonómica, comezará ás 11:00 horas diante do complexo da Consellería do Medio Rural en San Lázaro e rematará fronte á sede da Xunta en San Caetano.
A organización sindical explicou que a marcha busca reivindicar un modelo de extinción de incendios 100% público e único, no que todo o persoal teña “as mesmas condicións laborais” e se garantan a saúde e seguridade dos traballadores. Segundo a CIG, o actual funcionamento do servizo “pon en risco de morte ao persoal e á poboación” debido ao “abandono, desigualdade e mala xestión” da Administración autonómica.
“Somos quen estamos en primeira liña, quen arriscamos a vida en cada incendio e quen sostemos o servizo con profesionalidade e compromiso. Pero o noso esforzo non se ve recoñecido pola administración, que continúa ignorando as nosas demandas máis básicas”, advertiron os traballadores.
Entre as principais reivindicacións, o colectivo solicita ampliar o tempo de traballo do persoal fixo-descontinuo de 8 a 12 meses, co obxectivo de realizar tarefas de prevención de incendios forestais e atender tamén situacións de multiemergencias, o que permitiría “dar estabilidade e continuidade ao emprego”.
Tamén reclaman igualdade salarial e laboral entre o persoal funcionario e o laboral do servizo, mediante a extensión do actual acordo que regula as condicións dos primeiros. “A igual traballo, igual salario e condicións”, sostén o sindicato, que denuncia “discriminacións entre compañeiros que realizan as mesmas tarefas”.
Ademais, a CIG aproveita a convocatoria para denunciar o que cualifica como “descontrol e mala xestión” da Consellería do Medio Rural durante a vaga de incendios deste verán, marcada —segundo indican— pola falta de coordinación e improvisación, que “poñen en risco tanto ao persoal como ao territorio”.
Por último, o sindicato criticou a “actitude desleal e irresponsable” de CCOO, UXT e CSIF, aos que acusa de solicitar unha reunión coa Consellería “á marxe da representación maioritaria do persoal” despois de anunciarse a protesta.
