A Asociación Galiza por Palestina convoca á cidadanía de Santiago a participar este venres 24 de outubro nun acto de memoria e denuncia baixo o lema ‘Os nomes, para que a súa memoria non se borre’. A actividade, que se desenvolverá na Praza do Toural entre as 10:00 e as 20:00, consistirá na lectura pública dos nomes das crianzas asasinadas en Gaza, nun espazo habilitado cunha carpa e punto de lectura.
Segundo os datos difundidos polo Ministerio de Saúde de Gaza, máis de 19.500 menores de idade perderon a vida nos ataques rexistrados ata setembro, incluíndo máis de 1.000 bebés menores dun ano. Outras fontes internacionais, como Save the Children, elevan a cifra a 20.000 vítimas menores de 16 anos, mentres que a relatora especial da ONU Francesca Albanese advertiu que a cifra real podería ser “dez veces superior”, acadando até 680.000 persoas falecidas, das cales arredor de 380.000 serían crianzas menores de cinco anos.
Organizacións como Human Rights Watch e Amnistía Internacional manteñen dende hai meses as súas denuncias contra os ataques e vulneracións de dereitos humanos cometidos en Gaza. Tamén a Asociación Internacional de Estudosos do Xenocidio (IAGS) concluíu recentemente que Israel está a perpetrar un xenocidio baixo a cobertura dunha ofensiva militar continuada.
A acción, aberta á participación de toda a cidadanía, contará coa presenza de voluntariado e representantes institucionais, entre eles a alcaldesa Goretti Sanmartín, a tenente alcaldesa María Rozas e o concelleiro Xan Duro, xunto con membros do Movemento Global para Gaza-Galiza, Compostela por Palestina e diversas organizacións veciñais, sociais e sindicais.
Dende Galiza por Palestina insisten na necesidade de “non calar ante os crimes de guerra e as violacións dos dereitos humanos” que sofre o pobo palestino. “Non seremos cómplices do silencio e non imos parar. Non hai paz sen xustiza nin reparación”, sinalan nun comunicado.
O acto pretende ser unha mostra colectiva de solidariedade e memoria, lembrando as vítimas e reivindicando o dereito do pobo palestino a vivir en liberdade. “Para que a súa memoria non se borre. Para que os crimes non queden impunes. Viva Palestina Libre!”, conclúe a convocatoria.
