Os concelleiros do Partido Popular de Santiago de Compostela, Olaya Otero e José Ramón de la Fuente, advertiron este martes dun incremento de episodios de inseguridade en varias rúas do Ensanche compostelán, especialmente na contorna de Diego de Muros e Rodríguez Carracido.
Segundo explicaron, a situación está a xerar unha “importante preocupación entre veciños e comerciantes da zona”, que lles trasladaron “a existencia de cada vez máis situacións complicadas que alteran a convivencia e xeran alarma”.
A concelleira Otero indicou que se están a producir altercados na vía pública, increpacións a veciños, instalacións de tendas de campaña por parte de persoas sen fogar e episodios de menudeo de drogas, moitos deles “a plena luz do día”.
“Os veciños consideran inadmisible este escenario e néganse a resignarse a que se normalice”, engadiu a edil popular, quen apuntou que algúns comerciantes optan por traballar coas portas pechadas con chave por medo a posibles roubos ou incidentes.
Ante esta situación, Otero e De la Fuente instaron ao goberno municipal do BNG e Compostela Aberta a “non seguir mirando cara a outro lado” e lembraron que é “responsabilidade do Concello garantir algo tan básico e tan importante como a seguridade dos veciños e veciñas de Santiago”.
