A cidade de Santiago de Compostela acollerá hoxe xoves, 2 de outubro, unha concentración de protesta contra a intervención das forzas israelís sobre a Global Sumud Flotilla, que navegaba rumbo a Gaza con fins humanitarios. A mobilización, convocada polo Movemento Global para Gaza Galiza, celebrarase ás 20:00 na Praza Roxa e forma parte dunha rede de actos simultáneos noutras 15 vilas e cidades galegas.
A protesta chega poucas horas despois de que Israel interceptase, na noite de onte, parte do convoy formado por 44 barcos e arredor de 500 persoas a bordo, entre eles activistas e representantes políticos. Segundo a organización da flotilla, unha vintena de embarcacións foron xa detidas e trasladadas ao porto de Ashdod, mentres que outras perderon as comunicacións no medio da operación naval. Entre as persoas interceptadas figuran a activista Greta Thunberg e a exalcaldesa de Barcelona Ada Colau.
Os responsables da flotilla denunciaron que as comunicacións entre barcos foron saboteadas intencionadamente pola armada israelí para impedir que se transmitisen sinais de alarma e imaxes en directo do abordaxe. Pola súa parte, o Goberno israelí xustifica a operación cualificando a misión de “provocación” e insiste en que calquera axuda humanitaria debe canalizarse a través dos seus controis.
O convoy internacional, que saíra de Barcelona o pasado 30 de agosto, denunciara ao longo da súa travesía ataques con drons e manobras intimidatorias por parte de buques militares. A súa intención era romper o bloqueo sobre Gaza e abrir un corredor humanitario, algo que a propia flotilla considera avalado polo dereito internacional.
En paralelo, varios gobernos europeos —entre eles o español— activaron unidades de seguimento para prestar apoio consular ás persoas detidas. O Ministerio de Exteriores confirmou que a embaixada en Tel Aviv está en contacto coa delegación da UE e cos consulados na rexión.
