O salón de actos de UGT-Galicia, en Santiago, acolleu hoxe a presentación do libro 25 anos de sindicalismo en Citroën. 1977-2002, escrito por Jovito Rivas, quen fora secretario xeral da sección sindical de UGT en Citroën Vigo durante máis de dúas décadas. No acto participaron tamén o delegado do Goberno en Galicia, Pedro Blanco, e o director de Edicións Ir Indo, Xelasio Suárez, responsable da publicación.
Acompañaron ao autor os secretarios xerais de UGT-Galicia e UGT-FICA Galicia, Cristóbal Medeiros e Javier Carreiro, ademais de representantes das executivas sindicais, doutras federacións e da Unión de Compostela-Barbanza. Todos eles coincidiron en destacar o valor histórico e documental desta obra para comprender a evolución das relacións laborais nunha das principais factorías do país.
O libro reconstrúe, de forma cronolóxica, un cuarto de século de sindicalismo na planta de Citroën Vigo, desde a legalización dos sindicatos tras o final do franquismo ata o inicio do novo milenio. Nel recóllense folgas, convenios, procesos de negociación sobre salarios e xornada laboral, así como testemuños persoais, incluídas vivencias do propio autor.
Rivas analiza a consolidación dos sindicatos, as dificultades e tensións coas direccións da empresa, a reconversión industrial dos anos 80 e a presión dos cambios económicos e produtivos sobre a clase traballadora. O relato abrangue tamén o contexto político e social da transición e dos primeiros gobernos democráticos, incorporando reflexións sobre o papel da UGT e do propio movemento obreiro.
Segundo explicou o autor, a obra quere ser ao tempo unha homenaxe á loita dos traballadores e traballadoras e unha crónica crítica, na que se abordan tamén derrotas, resistencias e obstáculos legais que marcaron a historia da factoría. “Este libro pretende deixar constancia do esforzo colectivo que fixo que Vigo se identificase con Citroën como parte da súa identidade”, subliñou.
O volume está xa dispoñible baixo o selo de Edicións Ir Indo e constitúe, segundo os asistentes ao acto, unha referencia imprescindible para quen queira coñecer a realidade do sindicalismo nunha gran empresa automobilística en España entre 1977 e 2002.
