O secretario xeral de Movemento Sumar Galicia, Paulo Carlos López, instou á Universidade de Santiago de Compostela a dar un paso simbólico e institucional ao declararse “universidade de paz” e a rachar os vínculos de investigación que manteña con entidades e empresas israelís no marco dos programas europeos.
Segundo datos achegados pola organización, as tres universidades galegas participan actualmente en 16 proxectos financiados polo programa Horizonte Europa xunto a institucións de Israel, cun orzamento conxunto próximo aos 100 millóns de euros. A petición de Sumar céntrase en que a USC, xunto coa UDC e a UVigo, renuncie a eses proxectos “nos termos acordados en cada convenio”, mesmo se isto supón unha saída unilateral.
López puxo como referencia a decisión anunciada esta semana pola Universidade do País Vasco (EHU), que comunicou a súa retirada de proxectos compartidos con universidades e centros asociados ao sionismo por un importe superior aos 247 millóns de euros.
“Queremos que tamén a USC asuma como prioridade institucional a denuncia activa do xenocidio que está vivindo o pobo palestino”, declarou o dirixente de Sumar. Ademais, reclamou que a universidade deseñe un plan de continxenciapara asegurar a continuidade dos postos de traballo dos grupos de investigación e a produción científica no caso de interromper esas colaboracións.
Por último, o movemento solicita ao reitor da USC que, de forma conxunta cos doutras universidades galegas, insta á Comisión Europea e ao Goberno de España a excluír universidades, centros de investigación e institucións israelís dos fondos destinados á cooperación científica, académica e cultural.
